मोरङ : पछिल्लो छिमालका आशलाग्दो एकजना कविको नाम हो–गगन योक्पाङ्देन ।
उनले आफूले बाँचेको समय र समाजलाई कवितामा कलात्मक ढङ्गले प्रस्तुत गर्छन् । मोरङको मिक्लाजुङमा बसेर एक दशकदेखि निरन्तर कविता साधना गरिरहेका उनै गगनको पहिलो कविता कृति केवाफुङ्को गीत भर्खरै प्रकाशित भएको छ ।
माया पब्लिकेशन हाउसले बजारमा ल्याएको कविता कृति केवाफुङको गीत को भव्य गृह विमोचन सम्पन्न भएको छ । कवि योक्पाङदेनको गाँउ मिक्लाजुङमा सम्पन्न गृह विमोचन कार्यक्रमको अवशरमा केवाफुङको गीत भित्र समावेश एक दर्जन कविताहरु समेत बाचन गरिए ।
कविहरु सुदीप पाख्रिन, देवान किराती, पराजीत पोमु, विवश बलिभद्र कोइराला, मुना आत्रेय, रुमानी कुलुङ, सुनीता तामाङ, चन्द्र गुरुङ, रमेशचन्द्र अधिकारी, ददी अज्ञात र प्रदीप योङहाङले गगनका कविताहरु वाचन गरेर साथ दिए ।
कार्यक्रमका प्रमुख अतिथि कवि मनु मन्जिलले साइँली सोल्टीनीको वैँस शिर्षक कविताको एक अनुच्छेद वाचन गरेर सुरु भएको गृह विमोचन कार्यक्रममा कवि गगन योक्पाङदेन सँग हेमन यात्रीले काव्य संवाद गरे ।
कवि योक्पाङदेनले संवादका बीच कविता लेखन प्रकृया, कविताका विषय, लेखनशैली र कविता लेखन अनुभवका विविध आयामहरु साटे ।
“मेरा लागि कविता लेख्नु भनेको, सिर्फ लेख्नका लागि मात्रै होइन । मानिस जन्मेपछि अर्थहरु सहित बाँच्नुपर्छ । कविता लेखनले मलाई बाँच्नुको अर्थ दिन्छ । मेरो समयको कथा र मैले बाँचेको अनुभव मैले लेखिन भने, अरु कसैले लेख्दैनन् । यसकारणले पनि लेख्छु म” उनले भने ।
करिब डेढघन्टा सम्म चलेको कार्यक्रममा, कार्यक्रममा प्रमुख अतिथि कवि मनु मन्जिलले गगनका कविताहरु माथि आफ्ना धारणहरु राखेका थिए ।
उनले भने, “पछिल्लो समय नेपाली कविताको चमक हराउँदै गईरहेको बेला, गगनको कविताले आशाका किरण सञ्चार गरेको पाएँ । गगनको कविता पढीरहँदा, उनी कविताको लामो बाटो हिँड्न सक्ने बटुवा रहेछन् भन्ने महसुस हुन्छ ।”
गगन योक्पाङदेनका केही कविताले विश्वविख्यात कवि रविन्द्रनाथ टैगोरको गीताञ्जली नम्बर ५० को झल्को समेत दिने बताए ।
मिक्लाजुङ साहित्य समाजको आयोजनामा सम्पन्न उक्त गृह विमोचन कार्यक्रममा कोशी प्रदेशका विभिन्न जिल्लाबाट कवि लेखकहरुको सहभागिता थियो ।
Discussion about this post