हात्तीबाट अन्न जोगाउनलाई थापिएको करेन्टमा परी एकको मृत्यु

झापा : झापामा हात्तीबाट अन्नबाली जोगाउनलाई थापिएको विद्युतीय धरापमा परेर एक जनाको मृत्यु भएको छ । 

मृत्यु हुनेमा कचनकवल गाउँपालिका–७ बैगुनबारीका ६५ वर्षीय किर्खनाथ खनाल रहेका छन् । उनको बुधबार बिहान ८ः३० बजेतिर मृत्यु भएको हो ।

हात्तीले बालीमा क्षति नगरोस् भनेर खनाल आफैंले बारीमा तारबार गरेर करेन्ट प्रवाह गरेको पाइएको छ ।

तारबारमा प्रवाह गरेको करेन्ट लागेर खनालको घटनास्थलमै मृत्यु भएको झापा प्रहरीले जनाएको छ ।

घटनाबारे थप अनुसन्धान भैरहेको प्रहरीले जनाएको छ ।