इटहरी आउँदै गरेको ट्रक उदयपुरमा दुर्घटना हुँदा एकको मृत्यु

उदयपुर : बिहीबार (आज) बिहान उदयपुरगढी गाउँपालिका–७ अधेरीमा काठमाडौँबाट इटहरीतर्फ आउँदै गरेको ट्रक आफैँ अनियन्त्रित सडकमा पल्टिदा एक जनाको मृत्यु भएको छ ।

प्र १–०२–००१ ख ९२६० नम्बरको ट्रक आफैँ अनियन्त्रित भई सडक साइडमा पल्टी दुर्घटना हुँदा चालक त्रियुगा नगरपालिका–४ बगाहा बस्ने वर्ष ३५ का जीवन विकको मृत्यु भएको प्रहरीले जनाएको छ ।

शरीरको विभिन्न भागमा चोटपटक लागेको अवस्था जिल्ला अस्पताल उदयपुर ल्याइएकोमा उपचारको क्रममा बिहान ७ः१० बजे अस्पतालका चिकित्सकले उनलाई मृत घोषणा गरेका हुन् ।

घटनाबारे थप अनुसन्धान भइरहेको प्रहरीको भनाइ छ ।