इटहरी : झापाको बाह्रदशी गाउँपालिका–६ साधुकुटीमा आफ्नै बाबुले नाबालिका छोरीलाई पटकपटक बलात्कार गरेको भयावह घटना खुलेको छ ।
१५ वर्षीया नाबालिकामाथि आफ्नै बाबुले ६ वर्षभन्दा लामो समयदेखि बलात्कार गर्दै आएको खुलासा भएको हो । कक्षा ४ पढ्दादेखि सुरु भएको यौन दुर्व्यवहारबारे बालिकाले कक्षा १० मा पुगेर मात्रै घटना सार्वजनिक गरेकी हुन् ।
बालिकाले सुरुमा घटनाबारे आमालाई जानकारी गराउँदा सुरुमा विश्वास नगरिएको तर पछि भने कुटपिट गरी पटकपटक बलात्कार गरेको खुलेको हो ।
पीडकले पछिल्लोपटक १८ चैत ०८१ मा बलात्कार गरेको र १९ गते इलाका प्रहरी कार्यालय अनारमनीमा जाहेरी दिएपछि २० चैतमा पक्राउ गरिएको थियो ।
पक्राउपछि आनन्दमाथि कानुनी प्रक्रिया अगाडि बढाइएको र हाल पुर्पक्षका लागि थुनामा राखिएको प्रहरीले जनाएको छ । उनीमाथि बाल यौन दुव्र्यवहार सम्बन्धी कसूरमा अनुसन्धान अघि बढाइएको र हाल पुर्पक्षका लागि थुनामा पठाइएको छ ।
पीडित बालिकाकी ठूलीआमा (आमाकी दिदी)का अनुसार पीडकले बालिकालाई कक्षा ४ मा पढ्दादेखि नै बलात्कार गर्दै आएका थिए ।
‘१० कक्षामा पुगेपछि घटनाको सबै रहस्य बाहिरियो,’ उनले भनिन्, ‘घटना भएपछि साथीहरूलाई भनिछिन् । पछि आमालाई पनि भन्दा पत्यार लागेन । तर, चैतमा भने ‘लुगा खोल् नभए मारिदिन्छु’ भन्दै जबरजस्ती करणी गरेपछि आमालाई पनि थाहा भयो र प्रहरीमा जाहेरी दिइयो ।’
यसअघि पीडकले छोरीले लगाएको कपडासमेत जलाएको, घटनाबारे कसैलाई भनेमा मारिदिने धम्की दिएको, पटकपटक जबरजस्ती करणी गरेको ती महिलाले बताइन् ।
मारिदिने धम्कीकै कारण यसअघि घटना बाहिर नल्याएको पीीडतले बताएका छन् । बालिकालाई हाल सुरक्षित घर (सेफ हाउस)मा राखिएको छ ।
प्रहरीमा जाहेरी दिएपछि घटना दबाउन र प्रमाण नष्ट गर्न ज्यानै जानेगरी सामूहिक कुटपिट
पछिल्लोपटक भने पीडक राईका दिदीहरूले पीडित बालिकाका आमालाई ज्यानै जानेगरी निर्घात कुटपिट गरेको घटना बाहिरिएको छ ।
बेलायतदेखि आएका पीडकका दिदीहरूले बालिकाका आमामाथि ज्यानै जानेगरी सामूहिक कुटपिट गरेको बताइएको छ ।
‘पीडकविरूद्व उजुरी दिएपछि आमामाथि उनका आफन्तजनहरूले नियोजित ढंगले कुटपिट गरेका छन्,’ पीडित परिवारकी सदस्य उनले भनिन्, ‘विदेशबाट आएका आफन्तसहित चार जना महिलाले ढोका थुनेर ज्यानै लिने नियतले आक्रमण गरे । कुटपिटका क्रममा मोबाइलसमेत फुटाइयो र प्रमाण नष्ट गर्ने प्रयास गरियो ।’
मोबाइलमा भएका प्रमाण नष्ट गर्नका लागि निर्घात कुटपिट गरिएको उनले बताइन् । उनका अनुसार उक्त घटना २० साउनमा भएको हो । गम्भीर घाइते भएकी महिलाको अहिले बिर्तामोडस्थित बी एण्ड सी अस्पतालमा उपचार भइरहेको छ ।
‘मोबाइल फुटाउने र प्रमाण नष्ट हुन्छ भन्ने किसिमले कुटपिट गरियो,’ उनी भन्छिन्, ‘एकजना छोरी मान्छे बसेको ठाउँमा आएर योजनाबद्ध ढंगले, ज्यान मार्ने उद्देश्यले घाँटी थिच्ने, कसैले लछारपछार गर्ने र अर्को मानिसले मोबाइलबाट भिडियो बनाउने गरिएको छ ।’
बालिकाले भोगेको यौन हिंसा र आमाले पाएको आक्रमणले परिवारलाई गहिरो मानसिक र सामाजिक पीडा दिएको उनले उदृत गरिन् ।
परिवारले घटनाबारे प्रहरी र स्थानीय तहलाई पहिले पनि जानकारी गराएको भए तापनि गम्भीर रूपमा नलिएको गुनासो गर्दै आएका छन् ।
इलाका प्रहरी कार्यालय अनारमनीले घटनाको अनुसन्धान भइरहेको र संलग्नहरूमाथि आवश्यक कारबाही प्रक्रिया अगाडि बढाइने जनाएको छ ।
प्रहरी निरीक्षक सन्तोष राईले भने कुटपिटको विषयमा संलग्न चार जनालाई पक्राउ गरी हिरासतमा राखिएको बताए । ‘कुटपिट भएको विषयमा चार जनालाई ल्याइएको छ,’ उनले भने ।
नाबालिका बलात्कारको घटनामा संलग्न अहिले पुर्पक्षका लागि थुनामा रहेको प्रहरी निरीक्षक राईले बताए । उनले भने, ‘त्यो विषयमा अनुसन्धान सकेर अदालतमा बुझाइसकिएको छ, अदालतमा गइसकेको विषयमा र विचाराधीन रहेको विषयमा नबोलौँ ।’
बालिकामाथिको यौन हिंसा र आमामाथि भएको कुटपिटलाई छुट्टाछुट्टै मुद्दाका रूपमा हेरिएको प्रहरीले जनाएको छ । पीडित परिवारले दोषीहरूलाई कडा कारबाही गर्न माग गरेपनि स्थानीय जनप्रतिनिधिले भने मिल्न दबाब दिएको पीडितले जनाएका छन् ।
यसबारे जिल्ला प्रहरी कार्यालय झापाका प्रवक्ता, प्रहरी नायब उपरीक्षक (डीएसपी) खगेन्द्र बहादुर खड्काले पारिवारिक कारण रहेको बताए ।
‘कुटपिटको विषयमा सुरुमा भनाभन भएको र पछि सामान्य निहुबाटै यो अवस्था आएको बुझिएको छ,’ खड्काले भने, ‘आरोपितलाई प्रहरीले नियन्त्रणमा लिएको छ ।’
Discussion about this post