इटहरी : इटहरी र सुन्दरहरैंचाको सीमाक्षेत्र बूढीगंगा–जमुना मुक्तिधाममा यस वर्ष भव्य रूपमा ३६औं छठ पर्व मनाइने भएको छ ।
यस सम्बन्धमा छठ पर्व सेवा समितिद्वारा इटहरीमा पत्रकार सम्मेलन गरी तयारी, कार्यक्रम र खर्च विवरण सार्वजनिक गरिएको हो ।
सुव्यवस्थित तयारीसहित यस वर्षको छठ पर्वमा कोशी प्रदेशका विभिन्न जिल्ला र भारतका सीमावर्ती क्षेत्रहरूबाट करिब २ लाखभन्दा बढी श्रद्धालु भक्तजनहरू सहभागी हुने अनुमान गरिएको छ ।
समितिका सचिव मुकेशकुमार चौधरीले विगतका वर्षहरूमा महामारी, डेङ्गु तथा आर्थिक कठिनाइका बाबजुद समितिले निरन्तर धार्मिक परम्परा निर्वाह गर्दै आएको बताए ।
छठ पर्वको इतिहास स्मरण गर्दै उनले भने, ‘३५ वर्षअघि थोरै मानिसहरूले सुरु गरेको यो पर्व अहिले सम्पूर्ण नगरवासीको साझा पर्व बनिसकेको छ ।’
भाइटीकाको भोलिपल्ट कार्तिक ७ गते नदी, पोखरी, नहरमा स्नान गरी लौका तरकारी र चामलको भात खाने गरिन्छ ।
उनका अनुसार पहिलो दिन (कार्तिक ८) ब्रतालुहरूले लसुन, प्याजलगायत निषेधित वस्तु परित्याग गरी शुद्ध शाकाहारी भोजन ग्रहण गर्छन् ।
यसैगरी कार्तिक ९ गते घरको विशेष कोठालाई गोबरले लिपपोत गरी चोख्याएर पूजा गरिन्छ ।
‘यसको विशेषता भनेको भित्र पूजा नसकुन्जेलसम्म बाहिर परिवारजन, आफन्त तथा टोलबासीहरू पर्खेर बस्दछन्,’ उनले भने, ‘पूजापश्चात् व्रतालुले प्रसाद ग्रहण गरिसकेपछि मात्रै सबैलाई प्रसाद वितरण गरिन्छ । र, सोही समयबाट व्रतालुहरूले निराहार व्रत विधिवत् रूपमा सुरुवात गर्दछन् ।’
कार्तिक १० गते छठको मुख्य दिन निराहार व्रत बसिन्छ । अस्ताउँदो सूर्यलाई अर्घ अर्पण गरिने उनले बताए ।
११ गते भने सूर्योदयलाई जल चढाएर, सूर्य नारायण मन्दिरमा गई जल चढाएपछि मन्दिर प्राङ्गणबाटै छठ पर्व समापन हुने चौधरीले बताए ।
यस वर्ष पाँच सय ५० वटा पूजा घाट निर्माण गरेको समितिले जनाएको छ । घाट निर्माण, सरसफाइ, मन्दिर सजावट, सांस्कृतिक कार्यक्रमलगायत तयारीहरू अन्तिम चरणमा पुगेको जनाइएको छ ।
छठ पर्वलाई सभ्य, भव्य, सुरक्षित र सुव्यवस्थित बनाउनका लागि समितिले १८ वटा उप–समितिहरू गठन गरेको छ ।
जसमा अर्थ संकलन, पूजा घाट व्यवस्थापन, प्रचारप्रसार, भण्डारा, प्रसाद, सुरक्षादेखि मञ्च व्यवस्थापनसम्मका जिम्मेवारी बाँडिएका छन् ।
सुरक्षाका लागि १०० जना स्वयंसेवक, ५० जना सुरक्षा गार्ड, सिसी क्यामेरा निगरानी र ट्राफिक व्यवस्थापन गरिने समितिले जनाएको छ ।
कार्यक्रमको व्यवस्थापनका लागि २६ लाख रुपैयाँ बराबरको खर्च अनुमान गरिएको छ ।
Discussion about this post