इटहरी : कोशी प्रदेश प्रहरी प्रमुख प्रहरी नायब महानिरीक्षक (डीआईजी ईश्वर कार्कीले जिल्ला प्रहरी कार्यालय खोटाङको निरीक्षण गरी पहाडी ग्रामीण बस्तीमा समुदायसँग सहकार्य गरेर शान्ति–सुरक्षा अभिवृद्धि गर्न निर्देशन दिएका छन्।
कार्कीले कार्यालय तथा विभिन्न शाखाको अवलोकन गर्दै कार्यरत प्रहरीलाई अपराध नियन्त्रणमा समुदाय–प्रहरी सहकार्यलाई प्राथमिकतामा राख्न र सूचना संकलन तथा भेटघाटलाई सक्रिय बनाउन सुझाएका हुन्।
उनले खोटाङमा बढ्दो आत्महत्याको घटना नियन्त्रण गर्न सम्बन्धित स्वास्थ्य संस्था तथा निकायसँग समन्वय गरी मनोसामाजिक परामर्श सेवा उपलब्ध गराउने कार्यलाई तिव्रता दिन पनि निर्देशन दिए।
साथै, सडक दुर्घटना तथा समुदायमा सचेतनाको अभावबाट हुने अपराध रोकथामका लागि जनस्तरमै चेतनामूलक कार्यक्रम सञ्चालन गर्न पनि निर्देशन दिए।
निरीक्षणका क्रममा कार्कीले प्रहरी कर्मचारीको समस्या सम्बोधन गर्नेसमेत बताए। साथै, खोटाङको समग्र शान्ति–सुरक्षा अवस्थाबारे जिल्ला प्रहरी प्रमुख डीएसपी प्रकाश बुढाथोकीले जानकारी गराएका थिए।
कार्यक्रममा कोशी प्रदेश प्रहरी गणका प्रमुख एसपी रुकेश तण्डुकारसहित प्रहरी अधिकृत र कर्मचारीहरूको उपस्थिति थियो।
Discussion about this post