इटहरी : इटहरी उपमहानगरपालिका वडा नम्बर २० ले “अनेकतामा एकता, वडा नं. २० तरहराको विशेषता” भन्ने सन्देशसहित एक कार्यक्रम भएको छ।
वडाध्यक्ष मणिराम श्रेष्ठको अध्यक्षता तथा इटहरी उपमहानगरपालिकाका नगर प्रमुख हेमकर्ण पौडेलको प्रमुख आतिथ्यमा आयोजित उक्त कार्यक्रम तरहरामा बसोबास गर्ने विभिन्न जातजाति, भाषा, धर्म र संस्कृतिको संरक्षण तथा प्रवर्द्धन गर्ने उद्देश्यले आयोजना गरिएको थियोे ।
कार्यक्रमअन्तर्गत बिहान तरहरा बजार परिक्रमा गरिनुका साथै सगरमाथा खेलमैदानमा १२ वटा जातजातिको सांस्कृतिक झाँकी तथा विविध सांस्कृतिक प्रस्तुति देखाइएको थियो।
सहभागी जातजातिलाई जनही पाँच हजार रुपैयाँ, नगर प्रमाणपत्र र खादा प्रदान गरी सम्मान गरिएको थियो।
कार्यक्रमलाई सम्बोधन गर्दै वडाध्यक्ष श्रेष्ठले तरहरामा विभिन्न भाषा, धर्म र संस्कृतिका समुदायको सहअस्तित्व रहेको उल्लेख गर्दै यस्ता कार्यक्रमले तरहराको बहुसांस्कृतिक पहिचानलाई अझ सशक्त बनाउने बताए ।
उनले सामाजिक सद्भाव, आपसी सम्मान र संस्कृतिको संरक्षण कार्यक्रमको मुख्य उद्देश्य रहेको स्पष्ट पारे ।
नगर प्रमुख पौडेलले इटहरी–२० ले विभिन्न जातजातिलाई समेटेर आयोजना गरेको कार्यक्रम प्रशंसनीय रहेको बताउँदै यस्ता कार्यक्रमले सामाजिक एकता र समावेशितालाई बल पुग्ने धारणा राखे ।
सोही अवसरमा तरहरावासी फरक क्षमता भएका सुवास राई (विशाल), खेलकुद क्षेत्रमा सुशीला राई, कलाकारितातर्फ आश्मा विश्वकर्मा, वन्यजन्तु तथा फोटोग्राफी क्षेत्रमा निशान पराजुली शर्मा र नितेन मोक्तानलाई प्रमाणपत्र, खादा तथा सम्मान पत्र प्रदान गरियो ।
वडा सदस्य तथा कार्यक्रम संयोजक तनुज गुरुङ (सुरेश)ले स्वागत मन्तव्य राखेका थिए भने कार्यक्रममा उपप्रमुख संगीता कुमारी चौधरी, प्रमुख जिल्ला अधिकारी वासुदेव घिमिरे, प्रमुख प्रशासकीय अधिकृत मीनबहादुर भट्टराई, प्रहरी उपरीक्षक केशवकुमार थेवे, सशस्त्र प्रहरी उपरीक्षक निर्माणकुमार थापा, इटहरीका २० वटै वडाका वडाध्यक्षहरू, विभिन्न संघसंस्थाका प्रतिनिधि तथा जातजातिका अगुवाहरूको उल्लेख्य उपस्थिति रहेको थियो।
Discussion about this post