विराटनगर : नेपाल क्रिकेट फाउण्डेशनको आयोजनामा विराटनगर क्रिकेट लिग अन्तर्गत आइतबार भएको खेलमा सिद्धार्थ स्पोटिङ क्लब र विराट क्रिकेट एकेडेमी विजयी भएका छन् ।
पहिलो खेलमा डाइनामिक क्रिकेट एकेडमीलाई सिद्धार्थले ७३ रनको फराकिलो अन्तरले पराजित गर्दै २ अंकका साथ समूह बी को शीर्ष स्थानमा रहेको छ । यही समूहमा २ खेल खेलेको कटहरीले १ मा जित र १ मा पराजित हुँदै २ अंकका साथ दोस्रो, डाइनामिकले पनि १ मा जित र १ मा पराजित हुँदै २ अंकका साथ तेस्रो र लायन क्रिकेट एकेडेमि खेलेको १ खेलमा पराजित हुँदै लिगको पुछारमा रहेको छ ।
टस हारेर ब्याटिङको निम्तो पाएको सिद्धार्थले निर्धारित १८ ओभरमा ८ विकेट गुमाई १ सस ३७ रनको योगफल तयार पारेको थियो ।
सिद्धार्थका लागि अटल साहले रिटायर हर्ट हुनु पूर्व ४४ रन बनाएका थिए । अटलबाहेक फिर्दोस अन्सारीले ४० रन र रविन मण्डलले २९ रनको योगदान दिए । डाइनामिकका एसएस झाले ३ विकेट लिँदा विवेक झाले २ विकेट लिए ।
जवाफमा १ सय ३८ रनको लक्ष्य पछ्याएको डाइनामिकले १५ ओभरमा सवै विकेट गुमाई ६४ रनमा सिमित हुन पुग्यो ।
डाइनामिकका सुभाष रायले ११ रन बनाउनु बाहेक अन्य ब्याटरले दोहोरा अंकलाई छुन सकेनन् ।
सिद्धार्थका फिर्दोस अन्सारीले ३ विकेट लिँदा दुर्गेश मल्लिकले २ विकेट तथा दिेपेश कँडेल र निरज मुखियाले १–१ विकेट लिए । खेलको म्यान अफ द म्याच सिद्धार्थका फिर्दोस अन्सारी घोषित भए ।
समूह ए अन्तरगत भएको पहिलो खेलमा विराट क्रिकेट एकेडमीले इलाइट क्रिकेट क्लबलाई ५१ रनको स्कोरले पराजित गर्दै २ अंक जोडेको छ ।
टस जितेर ब्याटिङ गरेको विराटले निर्धारित २० ओभरमा ८ विकेट गुमाई १ सस ४१ रनको योगफल तयार पारेको थियो ।
विराटका लागि विशाल ढकालले अविजित ६० रनको योगदान दिँदा दिपक पासवानले १९ रन र लव कामतले १५ रनको योगदान दिए । इलाइटका सोनु सिंहले २ विकेट लिँदा हरेराम सिंह र राजु विश्वकर्माले २–२ विकेट लिए ।
जवाफमा १ सय ४२ रनको लक्ष्य पछ्याएको इलाइटले १८ दशमलव २ बलमा सबै विकेट गुमाई ९० रनमा सीमित हुन पुग्यो ।
इलाइटका चतुरानन्द मेहताले १८ रन बनाउँदा सागर मल्लिकले पनि १८ रन बनाए । विराटका महबुब इराकीले ३ विकेट लिँदा श्रवण यादवले पनि ३ विकेट लिए । त्यस्तै, दीपक पासवानले २ विकेट हात पारे । खेलको म्यान अफ द म्याच विराट विशाल ढकाल घोषित भए ।
Discussion about this post