विराटनगर : कोशी प्रदेश प्रहरीले सञ्चालन गरेको लागूऔषधविरुद्धको अभियानअन्तर्गत विभिन्न जिल्लाबाट २२ जनालाई पक्राउ गरेको छ।
पक्राउ परेकाहरूको साथबाट १८ ग्राम १५० मिलिग्राम ब्राउनसुगर, ५०२ चक्की प्रतिबन्धित औषधि, ९६ किलो गाँजा, एक मोटरसाइकल, एक स्कुटर र एक सिटी सफारी बरामद भएको प्रहरीले जनाएको छ।
झापामा वडा प्रहरी कार्यालय भद्रपुरले बिर्तामोड–६ का देवेन्द्र बिकलाई १ ग्राम ४२० मिलिग्राम ब्राउनसुगरसहित पक्राउ गरेको छ। त्यस्तै, दमक–३ का विकास भुजेल र भद्रपुर–७ की सरिता राजवंशीलाई ६ ग्राम ९० मिलिग्राम ब्राउनसुगरसहित पक्राउ गरिएको छ।
प्रहरी चौकी बिर्ताबजारले बिर्तामोड–३ का गणेशप्रसाद ओलीलाई ३०० मिलिग्राम ब्राउनसुगरसहित तथा बिर्तामोड–४ का चाल्स लिम्बू र उमेश लिम्बूलाई ३ ग्राम ९०० मिलिग्राम गाँजासहित नियन्त्रणमा लिएको छ। यस्तै, प्रहरी चौकी धरमपुरले शिवसताक्षी–२ का वीरगञ्ज आङदम्बेलाई स्पारेष्ट १०० र ट्रामाडोल १०० ट्याब्लेटसहित पक्राउ गरेको छ।
सुनसरीमा कोशी प्रदेश प्रहरीको टोली तथा इलाका प्रहरी कार्यालय धरान, इटहरी र चतराको संयुक्त टोलीले बराहक्षेत्र–१ का योगेश न्यौपानेलाई स्पास्मो–२९० चक्की र कोरेक्स एक बोतलसहित पक्राउ गरेको छ। धरान–२० का विक्रम उदास २ ग्राम २१० मिलिग्राम ब्राउनसुगरसहित पक्राउ परेका छन्।
इटहरीबाट मोहन परियार, सुमन पासवान, दिपेश राना मगर र सक्षम केसीलाई २०० मिलिग्राम ब्राउनसुगरसहित पक्राउ गरिएको छ।
जिल्ला प्रहरी कार्यालय सुनसरीले धरान–१७ का प्रकाश राईलाई ६४ किलो गाँजासहित पक्राउ गरेको छ। साथै धरान रेलवे क्षेत्रबाट बेवारिसे अवस्थामा ३२ किलो गाँजा बरामद गरिएको प्रहरीले जनाएको छ।
सप्तरीमा कञ्चनरूप–९ का शिवनारायण महत्तोलाई नाइट्रोजन–१२ चक्कीसहित तथा प्रदीप यादवलाई १ ग्राम ६० मिलिग्राम ब्राउन सुगरसहित पक्राउ गरिएको छ।
मोरङमा कोशी प्रदेश प्रहरीको टोली र इलाका प्रहरी कार्यालय रानीले कटहरी–३ का कमल रामलाई ५९० मिलिग्राम, दुहबी–८ का सन्दीप कार्कीलाई ४६० मिलिग्राम, पथरीशनिश्चरे–८ का शंकर माझीलाई ७२० मिलिग्राम तथा प्रहरी चौकी कर्सियाले धनपालथान–४ का गोपाल सहनीलाई ८०० मिलिग्राम ब्राउन सुगरसहित पक्राउ गरेको छ।
प्रहरीले पक्राउ परेका सबैमाथि लागूऔषधसम्बन्धी कसुरमा अनुसन्धान अघि बढाएको जनाएको छ।
Discussion about this post