इटहरी : सुनसरी र झापामा बिहीबार भएका दुई छुट्टाछुट्टै सवारी दुर्घटनाले दुई जनाको मृत्यु भएको छ भने तीन जना गम्भीर घाइते भएका छन्।
प्रारम्भिक अनुसन्धानले दुवै दुर्घटनामा तीव्र गति मुख्य कारण देखिएको छ भने सुनसरीको घटनामा ट्राफिक नियमविपरीत एउटै मोटरसाइकलमा तीन जना सवार रहेको पनि खुलेको छ।
पूर्व–पश्चिम राजमार्गअन्तर्गत सुनसरीको कोशी गाउँपालिका–७ केराबारीमा बिहीबार राति करिब ११ः१० बजेतिर मधेश प्रदेश ०१–००५ प ८३६० नम्बरको मोटरसाइकल आफैं अनियन्त्रित भई सडकछेउमा थुपारिएको ढुंगामा ठोक्किएको थियो।
दुर्घटनामा मोटरसाइकल चालक सप्तरीको हनुमाननगर–कंकालिनी नगरपालिका–१४ का २१ वर्षीय शिवानन्दन यादवको उपचारका क्रममा विराटनगरस्थित न्यूरो अस्पतालमा मृत्यु भएको सुनसरी प्रहरीले जनाएको छ।
मोटरसाइकलमा सवार सोही ठाउँका २१ वर्षीय शेखर मण्डल र १९ वर्षीय रविन यादव गम्भीर घाइते छन्। उनीहरूको न्यूरो अस्पतालमै उपचार भइरहेको छ। तीव्र गतिका कारण चालकले नियन्त्रण गुमाउँदा दुर्घटना भएको प्रारम्भिक अनुसन्धानबाट खुलेको छ।
यस्तै, झापाको कमल गाउँपालिका–२ छलफल चोकस्थित भित्री सडकमा बिहीबार साँझ करिब ६ः४० बजेतिर मे ११ प १६१८ नम्बरको स्कुटर अनियन्त्रित भएर दुर्घटना हुँदा पछाडि सवार धादिङको थाक्रे गाउँपालिका–११ घर भई झापाको कमल–६ बस्दै आएका ३० वर्षीय राजन तामाङको मृत्यु भएको प्रहरीले जनाएको छ।
उपचारका लागि दमकस्थित निम्स अस्पताल पुर्याइएका उनको उपचारकै क्रममा मृत्यु भएको हो।
दुर्घटनामा स्कुटर चालक इलामको माई नगरपालिका–१ घर भई झापाको दमक–५ बस्दै आएका १९ वर्षीय राजन महत गम्भीर घाइते भएका छन्। उनलाई थप उपचारका लागि बिर्तामोडस्थित बी एन्ड सी अस्पताल रिफर गरिएको छ।
दुवै सवारीसाधन प्रहरीले नियन्त्रणमा लिएर घटनाको अनुसन्धान गरिरहेको छ।
Discussion about this post