इटहरी : सुनसरीको बर्जुमा आयोजित तेस्रो बर्जु महोत्सवमा भोजपुरी कलाकार खेसरीलाल यादवलाई बोलाउनु नै गल्ती भएको छानबिन समितिले निष्कर्ष निकालेको छ ।
महोत्सवमा सुरक्षाकर्मीले बल प्रयोग गरेका कारण मानवीय क्षति टरेको छानबिन समितिले निष्कर्ष निकालेको हो ।
गत २३ पुसदेखि आयोजना भएको महोत्सवको अन्तिम दिन माघ ४ गते भोजपुरी कलाकार खेसारीलाल यादवलाई बोलाइएको थियो ।
यादव दिउँसो १२ बजे आउने भन्दै मेला आयोजक समितिले अग्रिम टिक बिक्री गरेको थियो । तर, प्रशासनले उनलाई आउन अनुमति नदिएपछि आक्रोशित भीडले स्टेज तोडफोड तथा आधा दर्जन सवारीसाधनमा आगजनी गरेको थियो ।
घटनापछि सहायक प्रमुख जिल्ला अधिकारी आनन्द पौडेल नेतृत्वको छानबिन समितिले आगजानी तथा तोडफोडको घटना योजनाबद्ध नभइ भीडको मनोविज्ञानकै कारण भएको निष्कर्ष निकालेको छ ।
छानबिन समितिको सदस्यमा जिल्ला प्रहरी कार्यालय सुनसरीका डीएसपी नरेन्द्रकुमार कार्की, सशस्त्र प्रहरी बल ४ नम्बर गणका डीएसपी मित्रलाल श्रेष्ठ, राष्ट्रिय अनुसन्धान जिल्ला कार्यालयका अनुसन्धान अधिकृत किरण भट्टराई र बर्जु गाउँपालिकाका प्रमुख प्रशासकीय अधिकृत प्रमोद चौधरी थिए ।
‘सिफारिसमा उल्लेख नभएपनि कार्यक्रमलाई लोकप्रिय बनाउन आयोजक तथा प्रयोजनकले आफूखुशी यादवलाई आमन्त्रण गरेको देखिन्छ’ समितिको प्रतिवेदनमा भनिएको छ, ‘त्यसैले विराटनगरमा आराम गरिरहेका उनलाई त्यहीँ रोकिएको थियो ।’
माघ २ गते पुनः प्रशासनले गाउँपालिकालाई महोत्सव सञ्चालनको अनुमति आजैबाट खारेज गरिएकोले तत्काल रोक्न पत्राचार गरिएको प्रशासनले जनाएको थियो । तर, आयोजकले महोत्सव बन्द गर्ने निर्णय नगरी विहारका कलाकार खेसरीलाल यादवलाई निमन्त्रणा गरेपनि उनलाई विराटनगरबाटै प्रशासनले आउन रोक लगाएको थियो ।
प्रतिवेदनमा कोभिड–१९ संक्रमणको व्यवस्थापन सम्बन्धी आदेशविपरीत छिमेकी देशका कलाकारलाई निमन्त्रणा दिनु गलत भनिएको छ ।
यो पनि – बर्जु महोत्सव : आगजनी तथा तोडफोडको विषयमा छानबिन गर्न समिति गठन, के भन्छन्–प्रजिअ ?
Discussion about this post