इटहरी : सुनसरीको बर्जु महोत्सवमा भएको आगजनी तथा तोडफोडको घटनाको छानबिन गर्न सुनसरी प्रशासनले छानबिन समिति गठन गरेको छ ।
आज (बुधबार) जिल्ला प्रशासन कार्यालय सुनसरीले सहायक प्रमुख जिल्ला अधिकारी आनन्द पौडेलको संयोजकत्वमा पाँच सदस्यीय समिति गठन गरेको हो ।
छानबिन समितिको सदस्यमा जिल्ला प्रहरी कार्यालय सुनसरीका डीएसपी नरेन्द्रकुमार कार्की, सशस्त्र प्रहरी बल ४ नम्बर गणका डीएसपी मित्रलाल श्रेष्ठ, राष्ट्रिय अनुसन्धान जिल्ला कार्यालयका अनुसन्धान अधिकृत किरण भट्टराई र बर्जु गाउँपालिकाका प्रमुख प्रशासकीय अधिकृत प्रमोद चौधरी छन् ।
पत्रकार सम्मेलनमा बोल्दै प्रमुख जिल्ला अधिकारी इन्द्रदेव यादवले प्रशासनको परिपत्र र निर्देशन अटेर गरी गाउँपालिकाले आफूखुशी महोत्सव सञ्चालनमा ल्याएको बताए ।
मंगलबार भोजपुरी कलाकार खेसरीलाल यादव महोत्सवमा नआएको भन्दै आक्रोशित स्थानीयले स्टेजमा तथा आधा दर्जन बढी सवारीमा आगजनी गरेका थिए ।
प्रशासनले घटना सम्बन्धमा पत्रकार सम्मेलनको आयोजना गरी घटनामा बर्जु गाउँपालिकाको कार्यालय पूर्ण दोषी रहेको बताएको छ । महोत्सव आयोजकका रुपमा रहेको गाउँपालिकाले प्रशासनको निर्देशन अटेर गर्दा दुर्घटना भएको प्रशासनको निष्कर्ष छ ।
पत्रकार सम्मेलनमा बोल्दै प्रमुख जिल्ला अधिकारी इन्द्रदेव यादवले प्रशासनको परिपत्र र निर्देशन अटेर गरी गाउँपालिकाले आफूखुशी महोत्सव सञ्चालनमा ल्याएको बताए ।
सिसिएमसिको कोरोना प्रोटोकल पालनाबारे गृहमन्त्रालयबाट निर्देशन आएपछि पुष २७ गते डिसिएमसिले पनि निर्णय गरि प्रजिअबाट आदेश जारी भएको र २८ गते सबै पालिकाहरूलाई कार्यान्वयन गर्न पुनः पत्राचार पनि गरिएको प्रजिअ यादवले बताए ।
माघ २ गते पुनः प्रशासनले गाउँपालिकालाई महोत्सव सञ्चालनको अनुमति आजैबाट खारेज गरिएकोले तत्काल रोक्न पत्राचार गरिएको प्रशासनले जनाएको छ । तर, आयोजकले महोत्सव बन्द गर्ने निर्णय नगरी विहारका कलाकार खेसरीलाल यादवलाई निमन्त्रणा गरेपनि उनलाई विराटनगरबाटै प्रशासनले आउन रोक लगाएको थियो ।
कलाकार आउने भनेर टिकट काटिएपनि कलाकार नआएपछि आक्रोशमा उत्रिएका स्थानीयले आगजनी गरेका थिए ।
बर्जु गाउँपालिकाका अध्यक्ष रघुनन्दन चौधरीले महोत्सव आयोजनाको विषयमा प्रशासनको आदेशलाई अवज्ञा गर्दा आगजनीको स्थिति आएको बताइएको छ ।
कोरोना संक्रमण बढेको भन्दै जिल्ला प्रशासन कार्यालय सुनसरीले महोत्सव बन्द गर्न परिपत्र गरेपनि अध्यक्ष चौधरीले ‘स्थानीय सरकार आफू भएको र मेरो गाउँपालिकामा भएको कार्यक्रम रोक्ने अधिकार कसैलाई नभएको’ भन्दै प्रमुख जिल्ला अधिकारी यादवसँग विवाद गरेको बुझिएको छ ।
Discussion about this post