यही पौष २५ गतेदेखि धरानमा हुन लागिरहेको धरान एक्स्पो २०८१ व्यापार, कृषि, र पर्यटन प्रवर्द्धनको मुख्य केन्द्रबिन्दु बन्ने अपेक्षा गरिएको छ ।
१० दिनसम्म चल्ने धरान रंगशालामा हुन लागिरहेको एक्स्पोको उद्घाटन उपप्रधानमन्त्री तथा सहरी विकास मन्त्री प्रकाशमान सिंहले गर्ने तयारी छ ।
स्थानीय व्यवसाय प्रवर्द्धनदेखि राष्ट्रिय स्तरका कार्यक्रमसम्मका विशेषताहरू समेटिएको यो एक्स्पोले धरानलाई आर्थिक गतिविधिको केन्द्रको रूपमा स्थापित गर्न भूमिका खेल्ने विश्वास लिइएको छ।
यसै सन्दर्भमा आयोजक सुनसरी उद्योग वाणिज्य संघका अध्यक्ष विजय श्रेष्ठसँग एक्स्पोका तयारी र अपेक्षाबारे गरिएको कुराकानीको सम्पादित अंश यहाँ प्रस्तुत गरिएको छ ।
धरान एक्स्पो २०८१ को मुख्य उद्देश्य के हो ?
यो एक्स्पोको मुख्य उद्देश्य स्थानीय व्यापार, उद्योग, र कृषि उत्पादनलाई नयाँ उचाइमा पुर्याउनु हो । यसले व्यवसायीहरूलाई आफ्नो उत्पादन र सेवा प्रदर्शन गर्ने प्लेटफर्म दिन्छ । साथै धरानलाई क्षेत्रीय व्यापारिक केन्द्रको रूपमा स्थापित गर्न मद्दत गर्छ ।
यसपटकको एक्स्पोलाई विगतका संस्करणहरूभन्दा फरक बनाउन के–कस्ता तयारीहरू भएका छन् ?
यसपटकको एक्स्पोलाई अझ प्रभावकारी बनाउन स्टलहरूको व्यवस्थापन, प्रचारप्रसार, र सहभागी व्यवसायहरूको छनोटमा ध्यान दिएका छौं । मनोरञ्जनका कार्यक्रम र सस्तो तर गुणस्तरीय सामानहरूको उपलब्धताले यसलाई विशेष बनाउने छ ।
स्थानीय स्तरका साना व्यवसायीहरूलाई एक्स्पोले कसरी फाइदा पुर्याउनेछ ?
यो एक्स्पो स्थानीय व्यवसायीहरूको लागि एउटा ठूलो अवसर हो । उनीहरू आफ्नो उत्पादन ठूलो संख्यामा ग्राहकहरु समक्ष पुर्याउन सक्छन् । साना व्यवसायीहरूले ठूला व्यापारीहरूसँगको सञ्जाल विस्तार गर्न पनि एक्स्पोलाई सदुपयोग गर्न सक्छन् ।
एक्स्पोको आर्थिक प्रभाव कस्तो हुने अपेक्षा गरिएको छ ?
हामीले अनुमान गरे अनुसार एक्स्पो अवधिभर १० करोडभन्दा बढीको आर्थिक कारोबार हुनेछ । यसले स्थानीय व्यवसायलाई नयाँ अवसर सिर्जना गर्न र धरानको अर्थतन्त्रलाई गति दिन महत्वपूर्ण भूमिका खेल्नेछ ।
एक्स्पोमा मुख्य आकर्षणहरू के–के हुनेछन् ?
यो एक्स्पोमा करिब एक सय ५० वटा स्टलहरू हुनेछन् । राष्ट्रिय कलाकारहरूको सांगीतिक प्रस्तुति, बाल उद्यान, र सस्तो सामानको बजार दर्शकका लागि विशेष आकर्षण बन्नेछन् ।
एक्स्पोले क्षेत्रीय पर्यटनमा के–कस्तो प्रभाव पार्ने अपेक्षा गरिएको छ ?
धरान एक्स्पोले धरानको सांस्कृतिक र पर्यटकीय महत्त्वलाई उजागर गर्नेछ । यसले पर्यटकहरूलाई आकर्षित गर्न र क्षेत्रीय पर्यटन व्यवसायलाई थप प्रवर्द्धन गर्न मद्दत गर्नेछ ।
एक्स्पोलाई सफल बनाउन संघले के–कस्ता साझेदारीहरू गरेका छन् ?
हामीले प्रदेश सरकार, स्थानीय संघसंस्था, र निजी क्षेत्रसँग सहकार्य गरेका छौं । यसले एक्स्पोलाई व्यवस्थित बनाउन र दर्शकहरूको सहभागिता बढाउन मद्दत गरेको छ ।
धरान एक्स्पोलाई आगामी दिनमा अन्तर्राष्ट्रिय स्तरमा लैजाने योजना बनाउनु भएको छ ?
छ । हामी एक्स्पोलाई अन्तर्राष्ट्रिय स्तरमा पुर्याउन चाहन्छौं । आगामी वर्षहरूमा विदेशी व्यापारिक प्रतिनिधिहरूलाई आमन्त्रित गरेर यसलाई विश्वव्यापी बनाउने हाम्रो योजना छ ।
अन्तिममा, एक्स्पोमा आउने दर्शक र व्यवसायीलाई तपाई के भन्न चाहनुहुन्छ ?
यो एक्स्पो केवल व्यापार र मनोरञ्जनको लागि होइन । यो हाम्रो स्थानीय पहिचान र आर्थिक गतिलाई अघि बढाउने महत्त्वपूर्ण अभियान हो । सबैलाई आग्रह छ, यस अवसरमा सहभागी भएर यसलाई सफल बनाउन सहयोग गरौँ ।
Discussion about this post