बाबुको स्मृतिमा तरहराका शिबु राईद्धारा माया घरमा पिउने पानीको बोरिङ जडान

तरहरा : आफ्ना बाबु स्व. टंकराज राईको स्मृतिमा इटहरी २० तरहराका शिबु रुम्दाली राईले माया घरमा पिउने पानीको बोरिङ जडान गरिदिएका छन् ।

लायन्स क्लब अफ तरहरा, इटहरीका सदस्य समेत रहेका उनले बिहीबार लायन्स मार्फत एक कार्यक्रमको आयोजना गरी इटहरी २ मा रहेको माया घरमा पिउने पानीको बोरिङ जडान गरेका हुन् ।

लायन्स क्लब अफ तरहराका अध्यक्ष दुर्गा प्रसाद पौडेलको अध्यक्षतामा सम्पन्न कार्यक्रममा माया घरकी अध्यक्ष राधीका दासी, लायन्स क्लब अफ तरहरा इटहरीकि आइपीपी मेनुका गिरी लगायत दर्जन भन्दा बढीको उपस्थितिमा माया घरमा जडान गरिएको पानीको बोरिङ उद्घाटन गरिएको थियो ।

कार्यक्रममा बोल्दै माया घरकी अध्यक्ष राधीका दासीले जीवनभर निःशुल्क पानी पिउने वातावरण सृजना गर्नु सराहनीय काम रहेको उल्लेख गरिन् । ‘एकपटक त पानीको ४२ हजार सम्म बिल उठेछ,’ उनले भनिन्, ‘यति भएपछि खानेपानीको लागि पैसा तिर्नु पर्दैन, जीवनभरका लागि वहाँले पुण्य काम गर्नुभयो ।’

सामाजिक सेवामा समेत अग्रसर रहेका शिबु राईले आफ्ना पिताको नाममा केही पुण्य काम गर्ने उदेश्यले माया घरमा खानेपानी जडान गरिएको बताए ।

‘बुवाको स्मृतिमा यहाँ खानेपानीको जडान गरेर सेवाको काम गरौँ भन्ने उदेश्यले यो काम गरिएको हो,’ उनले भने । साथै आजै सोही कार्यक्रमको अवसरमा पारेर उनले माया घरमा आश्रितहरुलाई खाना समेत खुवाएको र खाद्यान्न समेत वितरण गरेको बताए ।

असहायहरु आश्रित रहेको माया घरमा हाल ६० जना भन्दा बढी बसोबास गर्दै आएको माया घरकी सचिव शुभद्रा प्याकुरेलले बताईन् ।

‘धरानमा रहेको लाङ्गाली सामुदायिक बनमा ५६ जना बसोबास गर्दै आएका छन्, त्यहाँका मानिस पनि माया घरले जिम्मा लिएको छ,’ प्याकुरेलले टाकुरासँग भनिन्, ‘माया घरमा १ बर्षदेखि माथी ८० बर्ष सम्मका मानिस आश्रित रहेका छन् ।’

माया घरमा, घर तथा समाजबाटै अपहेलित भएका, मानसिक रोगी, रहेका र सडकमा भेटिएका असहायहरु आश्रित रहने गरेको उनले बताईन् । यहाँ हाल १ बर्षको बच्चादेखि ८० बर्ष सम्मका बृद्ध आश्रित रहेका छन् ।

०७४ सालमा स्थापना भएको यो संस्थाले हालसम्म ४० भन्दा बढीलाई पुनर्मिलन समेत गराइसकेको छ ।