विराटनगर : झापा क्षेत्र नम्बर ५ मा चुनावी समाचार संकलनका क्रममा विराटनगर निवासी पत्रकार अर्जुन आचार्यमाथि भएको साङ्घातिक आक्रमणको १५ दिन बितिसक्दा पनि प्रहरीले दोषीलाई पक्राउ गर्न सकेको छैन ।
किटानी जाहेरी दर्ता भएको दुई साता नाघिसक्दा समेत आरोपीहरू खुलामुलै हिँडिरहनुले सुरक्षा निकायको कार्यक्षमता र नियतमाथि प्रश्न उठेको छ ।
नेकपा एमालेका अध्यक्ष केपी शर्मा ओलीको निर्वाचन क्षेत्रमा ‘घरदैलो’ को समाचार संकलन गरिरहेका आचार्यमाथि गत फागुन १४ गते एमाले निकट भ्रातृ संगठन ‘भोलेन्टियर्स फोर्स’ का सदस्यहरूले कमल गाउँपालिका–६, जीवनचोकमा आक्रमण गरेका थिए ।
घटनाको भोलिपल्टै आचार्यले कमल–६ का युवराज पाठकसहित ५ जनाविरुद्ध इलाका प्रहरी कार्यालय दमकमा ‘अभद्र व्यवहार’ को मुद्दामा किटानी जाहेरी दर्ता गराएका थिए ।
घटना भएको एक सातासम्म पनि प्रहरीले कसैलाई पक्राउ नगरेपछि नेपाल पत्रकार महासंघ कोशी प्रदेशको नेतृत्वमा गएको टोलीले फागुन १९ गते कोशी प्रदेश प्रहरी प्रमुख डीआईजी विनोद घिमिरेलाई भेटेर ध्यानाकर्षण गराएको थियो ।
भेटका क्रममा घिमिरेले तत्काल दोषीलाई पक्राउ गरी कारबाहीको दायरामा ल्याउन झापा प्रहरीलाई निर्देशन दिएका थिए ।
डीआईजीको निर्देशनपछि पनि ११ दिन बितिसकेको छ। तर झापा प्रहरीले अहिलेसम्म कसैलाई पनि नियन्त्रणमा लिएको छैन ।
झापा प्रहरी प्रमुख एसपी बसुन्धरा खड्काले घटनालाई गम्भीरतापूर्वक लिएको र दोषीहरूको खोजी भइरहेको बताइन् । ‘हामीले खोजी कार्यलाई तीव्रता दिएका छौँ, सबै कोणबाट अनुसन्धान भइरहेको छ,’’ उनले भनिन् ।
यसरी भएको थियो आक्रमण
एमालेको घरदैलो अभियानका क्रममा केही महिलाहरूले राष्ट्रिय स्वतन्त्र पार्टी (घण्टी) मा मतदान गर्ने बताएका थिए । सोही दृश्यको भिडियो खिचिरहेका आचार्यमाथि फोर्सका सदस्यहरूले मुक्का र बुट प्रहार गरेको पीडित पत्रकारले बताएका छन् ।
जाहेरीमा उल्लेख भए अनुसार आचार्यलाई अपहरण गर्ने उद्देश्यले बा २ च ९६१ नम्बरको सेतो स्कोर्पियोमा जबर्जस्ती चढाउन खोजिएको थियो भने दमक पुगेर ‘थप देखाइदिने’ धम्की समेत दिइएको थियो ।
आक्रमणकारीले आचार्यको मोबाइल र चस्मा समेत लुटेका छन् । आचार्यले आफ्नो लुटिएको सामान फिर्ता, शारीरिक तथा मानसिक क्षतिको क्षतिपूर्ति र उपचार खर्च भराउन समेत माग गरेका छन् ।
Discussion about this post