इटहरी : १६ चैत्र ०७७ मा इटहरी २ स्थित घरमै सुतिरहेको अवस्थामा यहाँका केशव कार्कीको भाला प्रहारबाट हत्या भयो ।
सोही ठाउँका ५१ वर्षीय कान्छा भनिने जीवनाथ रेग्मीले सुतिरहेका कार्कीमाथि भाला प्रहार गरेर हत्या गरेको केहीबेरमै उनलाई प्रहरीले पक्राउ गर्यो ।
भाला प्रहारबाट गम्भीर घाइते भएका ५० वर्षीय कार्कीको उपचारको लागि लैजादैँ गर्दा बाटोमै मृत्यु भयो । घटनालगत्तै क्षेत्रीय कृषि अनुसन्धानमा लुकेर बसेका रेग्मीलाई प्रहरीले नियन्त्रणमा लिएर सुनसरी जिल्ला अदालतबाट सातदिनको म्याद थप गरी अनुसन्धान गरिरहेको छ ।
‘पुरानो रिसिइबी साँध्नका लागि योजनाबद्ध रुपमा हत्या गरिएको प्रारम्भिक अनुसन्धानबाट खुलेको छ,’ इलाका प्रहरी कार्यालय इटहरीका प्रहरी नायव उपरीक्षक (डीएसपी) अर्जुन केसीले टाकुरान्यूजसँग भने, ‘यसअघि सामान्य विवादमा हात हालाहालको स्थिति सृजना भएपछि रिसिइबी साँध्न हत्या गरेको खुलेको छ ।’
डीएसपी केसीका अनुसार मदिराले लठ्ठ भएका रेग्मीले योजनाबद्ध रुपमै हत्या गरेको खुलेको छ । ‘उनले यसअघि पनि पटक–पटक प्रहार गर्ने कोसिस गरेका रहेछन्,’ केसीले भने, ‘प्रहार गर्नकै लागि भाला समेत बनाएर राखेको र यसअघि पनि पटक–पटक प्रयास गर्दा असफल भएपछि घरमै सुतेको अवस्थामा भाला प्रहार गरेको खुलेको छ ।’
प्रहरीका अनुसार रेग्मीले केही समयअगाडिदेखि कार्कीको हत्या गर्ने योजना बनाएका थिए । तर, होलीको दिन भने मदिराले लठ्ठ भएका उनले घरमै सुतिरहेको अवस्थामा भाला प्रहार गर्दा कार्कीको मृत्यु भयो । यसअघि काठ तस्करीको समेत मुद्धा खेपेका रेग्मीको कर्तुतबारे प्रहरीले थप अनुसन्धान गरिरहेको जनाएको छ । मान्छेको ज्यान लिनकै लागि भाला बनाएका रेग्मीले मनसायप्रेरित घटना गराएको प्रहरीको भनाइ छ । मादकपदार्थ सेवन गरेपनि अगाडिदेखिकै योजनाअनुसार कार्कीको हत्या भएको प्रहरीको अनुसन्धानबाट खुलेको छ ।
‘मान्छेको ज्यान लिनकै लागि उक्त भाला बनाएको स्वीकार गरेका छन्,’ डीएसपी केसीले भने, ‘यसअघिको प्लान फेल भएपछि योजना बनाएर हत्या गरेको देखियो ।’
डीएसपी केसीका अनुसार योजनाबद्ध रुपमा ज्यान केसको सजाय जन्मकैदसम्म हुनसक्छ । उक्त घटना मनसाय प्रेरित घटना भएकाले धेरै सजायको व्यवस्था हुने उनले बताए । ‘कुनै घटना मनसाय र कुनै अभिप्रेरित घटना हुन्छन्,’ उनले भने, ‘मादकपदार्थ सेवन गरेरै भएको घटना धेरै भएपनि प्रायजसो मनसायप्रेरित घटना छन्, यो पनि त्यहीभित्र पर्छ ।’
स्थानीयका अनुसार रेग्मी जंगलको काठ तस्करीमा संलग्न थिए । यसअघि पनि बनमुद्धा खेपेका उनले जंगलबाट दाउरा, काठजन्य वस्तु तस्करी गरेर बेच्ने र त्यहीबाट जीवीकोपार्जन गर्दै आएका थिए । घमण्डी स्वभावका रेग्मीले जंगलबाट ल्याएको दाउरा र काठ बेचेरै हालसम्म जीवीकोपार्जन गर्दै आएको स्थानीय बताउँछन् ।
स्थानीयका अनुसार मृतक केशव कार्की भने यसअघि शान्तिनगर सामुदायिक बनका कार्यसमिति सदस्य पनि हुन् । सोही बेला मनमुटाव भएको हुनसक्ने र रिसिइबी साँध्न हत्या भएको हुनसक्ने स्थानीयबासीको भनाइ छ ।
‘कार्की जंगलको कार्यसमितिको सदस्य र टोलको प्रतिनिधि पनि थिए, त्यही बेलामा काठ चोरी गर्दा मनमुटाव भएको हुनसक्छ,’ स्थानीयमध्येका एकले टाकुरासँग भने, ‘काठ तस्करी गर्दा रेग्मीलाई कार्कीले ‘सपोर्ट’ नगरेका कारण पनि हत्या भएको हुनसक्छ ।’
रिसिइबी साँध्न भएको उक्त घटनाले यतिबेला इटहरी २ शान्तिनगरका स्थानीयबासी विक्षिप्त बनेका छन् ।
यो पनि – इटहरीमा भाला प्रहार गरी कार्कीको हत्या, घटनामा संलग्न रेग्मी पक्राउ
Discussion about this post