इटहरी : नेशनल लाइफ इन्स्योरेन्स कम्पनीले शनिवार (आज) एकै दिन मोरङको केराबारीमा चारजना आश्रित परिवारलाई घरघरमा पुगेर बीमा लाभ बापतको रकम हस्तान्तरण गरेको छ ।
नेशनल लाइफ इन्स्योरेन्स कम्पनीमा विभिन्न समयमा बीमा गरी मृत्यु भएका केराबारी ३ का राजु देवान, वडा नं.१० का चुरानसिंह विक, हस्तवहादुर (सनम) मगर, बेलबारी ८ भाउनेका रञ्जित सुब्बा लिम्बूको निधनपछि आश्रित परिवारलाई मृत्यु भएको छोटो समयमा कम्पनीका प्रतिनीधि घर घरमा पुगेर ७८ लाख ७५ हजार बराबरको बीमा लाभ भुक्तानी गरेको हो ।
कम्पनीमा ०७७ मंसिर ३० गते ५० लाखको बीमा गरेका केराबारी ३ का राजु देवानको ०७८ श्रावन ३१ गते कोरोनाभाइरस संक्रमणबाट मृत्यु भएको थियो । देवानको श्रीमती गंगामाया लिम्बूलाई कम्पनीका प्रदेश प्रमुख नरेन्द्र राईले ५१ लाख ८६ हजार ६ सय ६७ रुपैँयाको चेक हस्तान्तरण गरेका छन् । देवानले १५ वर्षे अवधिको बीमा गरी ४ लाख ६६ हजार रुपैया प्रिमियम जम्मा गरेका थिए ।
यस्तै, केराबारी १० का चुरानसिंह विकको श्रीमतीलाई पनि मृत्यु दावी अन्र्तगतको बीमा लाभ भुक्तानी गरिएको छ ।
६ वर्ष अघि ५ लाखको बीमा गरी वार्षिक ४३ हजार २ सय २८ रुपैँया प्रिमियम बुझाउँदै आएका विकको २०७८ भाद्र ६ गते मृत्यु भएपछि उनको श्रीमती अम्बिका बराइलीलाई बीमाङ्क र ६ वर्षको बोनस सहित ६ लाख ८८ हजार ५सय रुपैँयाको चेक हस्तान्तरण गरिएको हो ।
त्यसैगरी केराबारी १० का बीमित हस्तवहादुर (सनम) मगरको श्रीमती कविता मगरलाई १ लाख रुपैँयाको चेक हस्तान्तरण गरेको छ ।
बीमित श्रायन मगरको प्रस्तावक रहेका बुबा हस्तवहादुर मगरको मृत्युपछि आश्रित परिवारका तर्फबाट कवितालाई सो रकम प्रदान गरिएको हो । अब उनको बीमाको किस्ता तिर्नु नपर्ने र बीमा अवधि पछि पुनः २ लाख प्रदान गरिने पत्र समेत हस्तान्तरण गरिएको छ । बाल अमृत बीमा लेख अन्र्तगत १ लाखको बीमा गरेका मगरले वार्षिक ७,६८४ का दरले ५ वर्षको किस्ता बुझाएका थिए ।
यस्तै, बैदेशिक रोजगारीका क्रममा निधन भएका बेलबारी ८ भाउन्नेका बीमित रञ्जित सुब्बा लिम्बूको श्रीमती बबि सुब्बा लिम्बूलाई पनि १४ लाख रुपैँयाको चेक प्रदान गरिएको छ ।
कम्पनीले केराबारीमा पहिलो पटक घातक रोग उपचार खर्च पनि प्रदान गरेको छ । एक वर्ष अघि ५ लाखको बीमा गरेका केराबारी १० का बीमित हर्कमाया मगरलाई मुटुरोग लागेकाले उपचार खर्च बापत ५ लाख रुपैँया प्रदान गरिएको हो ।
चेक प्रदान गर्न कम्पनीका प्रदेश नं का प्रमुख नरेन्द्र राई, इटहरी शाखा प्रमुख भोजमान श्रेष्ठ, पेशागत बीमा अभिकर्ता संघका अध्यक्ष किशान शाही लगायतका अभिकर्ताहरू घरघरमा पुगेका थिए ।
Discussion about this post