इटहरी : इटहरी उपमहानगरपालिकाको गेटै अगाडि देखिन्छ, एउटा कालो ब्यानर । ब्यानरमा लेखिएको छ–‘सर्पहरू गीत, संगीत सुन्दैनन् ।’
इटहरीका स्रष्टाहरू झण्डै एक महिना अघिदेखि उपमहानगरपालिकाले कला, साहित्य, संगीतका लागि बजेट बिनियोजन नगरेको तथा पुस्तकालय उत्थानका निम्ति कुनै कदम नचालेको भन्दै आन्दोलनरत छन् ।
लेखक समाजकी मिथिला पोखरेलले इटहरी सरकारले स्रष्टा विरोधी गतिविधि गरेकाले आफूहरू आन्दोलनरत रहेको बताइन् ।
‘छिमेकी नगर धरान, सुन्दरहरैँचा, बेलबारीमा कला साहित्यका लागि बजेट बिनियोजन भएको छ, तर इटहरीमा स्रष्टा विरोधी गतिविधिविरूद्व हामीले मौन विरोध गरेका हौँ,’ पोखरेलले भनिन्, ‘पटकपटक उपमेयरसँग छलफल गरेर विज्ञप्ती दिएपनि उहाँले वास्तै गर्नुभएन, त्यसैले नगरपालिकाको गेटमा कालो ब्यानर राखेर सांंकेतिक विरोध गरेका हौँ ।’
उनका अनुसार आफूहरूले झण्डै एक महिना अघिदेखि आवाज उठाइरहेको भएपनि उपमहानगरले चासो राखेको छैन ।
भएको पुस्तकालय तथा सांस्कृतिक भवन समेत मासेको उपमहानगर स्रष्टा विरोधी रहेको उनको तर्क छ । ‘नगरपालिकाले वास्तै गरेको छैन, लेखन, कला, साहित्यका मानिसलाई बोलाएर आधिकारिक छलफल राखेको छैन,’ उनले टाकुरा न्यूजसँग भनिन्, ‘काग कराउँदै गर्छ, पिना सुक्दै गर्छ जस्तो भएको छ, कसैको चासोको विषय भएन ।’
उनले कला साहित्यमा लागेका मानिसको पनि मनको मैलो हुने भन्दै मनको मैलोलाई गीत, संगीतले मात्रै पखाल्ने तर्क राख्दै भनिन्, ‘कला, साहित्यमा लागेका मानिसको मनको मैलो धूने गीत, संगीतले नै हो, तर उपमहानगर बेखबर जस्तो बनिरहेको छ,’ उनले भनिन् ।
यसअघि इटहरी उपमहानगरपालिकाका विषय विज्ञ सल्लाहकार प्रा.डा. बद्रीविशाल पोखरेलले राजीनामा समेत दिएका थिए । इटहरीको बहुआयामिक विकास निर्माणमा सहयोग, सल्लाह र सुझावका लागि भन्दै उनलाई उपमहानगरले विषय विज्ञका रूपमा सल्लाहकारमा मनोनित गरेको थियो ।
तर, राजीनामा दिदैं पोखरेलले भनेका थिए, ‘दिइएको महत्वपूर्ण सुझावहरूलाई प्रमुख र उपप्रमुखद्वारा बेवास्ता गरियो, उपमेयर लक्ष्मी गौतमकै निर्देशनमा पालिकामा भएका पुस्तकालयका पुस्तकहरू इटहरीका विभिन्न साहित्यिक प्रतिष्ठानमा वितरण गरेर पुस्तकालयबिहीन इटहरी बनाउन खोजेपछि स्रष्टाहरूले दबाब दिएपछि पहिलेको समृद्व पुस्तकालय खुम्चिएकै अवस्थामा भएपनि घिटघिटी हुँदै बाँचेको छ,’ राजीनामा पत्रमा डा. पोखरेलले लेखेका छन्, ‘त्यसैले यस खालका चरम अबौद्विक र गैरसाहित्यिक चरित्र र चिन्तन भएका जनप्रतिनिधिका गैर जिम्मेवार गतिविधिबाट आजित भएर मैले सल्लाहकार सदस्यबाट राजीनामा दिएको छु ।’
पालिकाबाट गरिएको चरम उपेक्षा र अपमान सह्य नभएको भन्दै आफूले राजीनामा दिएको उनले बताए । राजीनामा पत्रको सुरूमै डा. पोखरेलले ‘सर्पहरू गीत, संगीत सुन्दै सुन्दैनन्’ भनेर लेखेका छन् ।
प्रगतिशील लेखक संघ सुनसरीका अध्यक्ष समेत रहेका इटहरीका स्रष्टा रामप्रसाद खरेलले कला, साहित्य नबुझेका जनप्रतिनिधिको उपज अहिलेको आन्दोलन रहेको बताए ।
‘जनप्रतिनिधिहरू कोही, कसैले पनि कला, साहित्य बुझेका छैनन,’ उनको तर्क छ, ‘राजनीतिमा पठन संस्कृति कति छ भन्ने पनि महत्वपूर्ण कुरा हो ।’ राजनीतिक पार्टीहरुको एजेन्डामा कला, साहित्य नहुनु र यो क्षेत्र अनुत्पादक क्षेत्र हो भन्ने बुझाइ हुनुले नोक्सानी गरेको उनले बताए ।
नीति तथा बजेट बिनियोजन कार्यक्रममा पारित भएका कुराहरू कार्यान्वयन नभएकाले संस्थागत विकास नभएको उनको चिन्ता छ । विशेषतः राजनीतिक पार्टीहरूको संस्कार नै परिवर्तन गर्न आवश्यक रहेको उनले बताए ।
उनले भने, ‘कला, साहित्य बुझ्ने मानिस नै जनप्रतिनिधि भएनन्, बौद्विक क्षेत्रमा लगानी गर्ने पैसा अनुत्पादक हो भन्ने उनीहरूको बुझाइ छ ।’
यो पनि – इटहरी उपमहानगरकोे सल्लाहकारबाट राजीनामा दिदैं डा। पोखरेलले भने, ‘सर्पहरू गीत सुन्दैनन्’
Discussion about this post