इटहरी : सुनसरीका १२ वटा स्थानीय तहमध्ये सबैभन्दा बढी मतदाता इटहरीमा रहेको निर्वाचन आयोगले जनाएको छ ।
निर्वाचन आयोगले सार्वजनिक गरेको मतदाता नामावली अनुसार सुनसरीको सबैभन्दा बढी मतदाता इटहरीमा रहेका हुन् ।
आगामी बैशाख ३० गते हुने निर्वाचनमा सुनसरीमा कुल ५ लाख ३४ हजार ७ सय ६५ जना मतदाता छन् ।
आयोगका अनुसार इटहरी उपमहानगरपालिकामा एक लाख ४ हजार ६ सय २६ जना मतदाता छन् । ती मध्ये ५४ हजार ७ सय महिला मतदाता हुन् भने ४९ हजार ९ सय २५ जना पुरुष मतदाता हुन् । यस्तै, १ जना मतदाता अन्य छन् ।
इटहरीमा २५ वटा मतदातस्थल हुनेछ भने १११ वटा मतदान केन्द्र हुनेछ ।
यता, धरानमा एक लाख ३ सय २४ जना मतदाता छन् । ती मध्ये ५२ हजार ९१६ जना महिला छन् भने ४७ हजार ४०८ जना पुरुष मतदाता छन् । धरानमा २८ वटा मतदातस्थल र १०७ वटा मतदान केन्द्र रहने निर्वाचन आयोगले जनाएको छ ।
यस्तै, बराहक्षेत्र नगरपालिकामा ६३ हजार ६ सय ८ जना मतदाता छन् भने इनरुवा नगरपालिकामा ४२ हजार ७ सय ४८ मतदाता छन् ।
यस्तै, रामधुनी नगरपालिकामा ४१ हजार ४ सय ७८ जना मतदाता पुगेका छन् भने दुहबी नगरपालिकामा ३६ हजार ७ सय ३० जना मतदाता छन् ।
उता, देवानगञ्ज गाउँपालिकामा २३ हजार ५ सय ७८ मतदाता छन् । गढी गाउँपालिकामा २३ हजार ८ सय १७ जना मतदाता छन् । कोशी गाउँपालिकामा २६ हजार ४ सय ६६ मतदाता छन् ।
बर्जु गाउँपालिकामा २२ हजार ४ सय ६७ मतदाता छन् भने भोक्राहा–नरसिंह गाउँपालिकामा २४ हजार १ सय १ मतदाता छन् भने हरिनगर गाउँपालिकामा २४ हजार ८ सय २२ जना मतदाता रहेको आयोगले जनाएको छ ।
हेर्नुहोस् तालिका ।
Discussion about this post