मोरङ : गोप्य राखिएको प्रेम सम्बन्ध बाहिरिने डरले मोरङको जहदामा एक व्यक्तिको ज्यान गएको प्रारम्भिक प्रहरी अनुसन्धानले देखाएको छ ।
श्रीमती र उनका प्रेमी (भारतीय नागरिक) मिलेर योजनाबद्ध रूपमा श्रीमान्को हत्या गरेको आरोपमा प्रहरीले दुई जनालाई पक्राउ गरेको छ ।
मृत्यु हुनेमा जहदा गाउँपालिका–२ मोहनपुरका ४० वर्षीय बुधराम सोरेन रहेका छन् । प्रहरीका अनुसार आइतबार राति करिब ९ बजे उनको टाउकोमा फलामको रड प्रहार गरिएको थियो । गम्भीर चोट लागेका सोरेनको घटनास्थलमै मृत्यु भएको थियो ।
घटनामा संलग्न रहेको आरोपमा प्रहरीले मृतककी ३५ वर्षीया श्रीमती कमली बास्के र भारतको बिहारस्थित कटिहार निवासी २७ वर्षीय सुनील मिश्रलाई नियन्त्रणमा लिएको छ ।
मोरङ प्रहरीका अनुसार कमली र सुनीलबीच प्रेम सम्बन्ध रहेको र त्यसबारे बुधरामले जानकारी पाएपछि दुवैले मिलेर उनको हत्या गर्ने योजना बनाएको प्रारम्भिक अनुसन्धानबाट खुलेको छ ।
घटनालगत्तै प्रहरीले सुनीललाई घटनास्थलबाटै पक्राउ गरेको थियो । फरार भएकी कमलीलाई भने सोमबार (आज) बिहान करिब ७ः३० बजे घरबाट एक किलोमिटर पश्चिमतर्फ खेतमा भाग्दै गरेको अवस्थामा नियन्त्रणमा लिइएको प्रहरीले जनाएको छ ।
प्रहरीले हत्यामा प्रयोग भएको फलामको रडसमेत बरामद गरेको छ । मृतकको शव पोस्टमार्टमका लागि कोशी अस्पताल विराटनगर पठाइएको छ ।
प्रहरीले घटनालाई योजनाबद्ध हत्या हुन सक्ने आशंकामा थप अनुसन्धान गरिरहेको छ । पक्राउ परेका दुवैविरुद्ध कर्तव्य ज्यानसम्बन्धी कसुरमा अनुसन्धान अघि बढाउने तयारी गरिएको छ ।
मुलुकी देवानी संहिता, २०७४ को व्यवस्थाअनुसार पति र पत्नीबीच आपसी प्रेम, सद्भाव र सम्मान कायम राख्दै सँगै बस्नुपर्ने दायित्व हुन्छ । कुनै पनि सदस्यले आफ्नो जीवनसाथी बाहेक अन्य व्यक्तिसँग अनधिकृत सम्बन्ध राखेमा त्यो कानूनी रूपमा सम्बन्ध विच्छेदको प्रमुख आधार बन्न सक्ने संहिताले औँल्याएको छ ।
Discussion about this post