इटहरी : प्रदेश १ मा एक वर्षको अवधिमा ८ सय ४६ वटा यौनजन्य घटना भएको पाइएको छ ।
प्रदेश प्रहरी कार्यालय विराटनगरका अनुसार आर्थिक वर्ष २०७७÷७८ मा ८ सय ४६ यौनजन्य घटना भएको पाइएको हो ।
जसमध्ये ५ सय ९० घटना बलात्कार र १ सय ७० वटा बलात्कार प्रयासका घटना रहेका छन् । चालू आर्थिक वर्षमा भने फागुन महिनासम्म ४ सय १२ घटना दर्ता भएको उल्लेख गरिएको छ ।
महिलाका अधिकार शुनिश्चत गर्नुपर्ने मागसहित मन्त्रीलाई ज्ञापन पत्र
यसैबीच महिला अधिकारका सवालमा काम गर्दै आएका सामाजिक संघसंस्थाले महिलाका अधिकार शुनिश्चत गर्नुपर्ने मागसहित ज्ञापन पत्रबुझाएका छन् । बुधबार प्रदेश १ का आन्तरिक मामिला तथा कानूममन्त्री केदार कार्कीलाई मन्त्रालयमा ज्ञापनपत्र बुझाउँदै पीडितलाई न्याय र पीडकलाई कारबाहीको माग गरेका गरेका हुन् ।
विद्यालयमै महिलाहरू असुरक्षित रहेको कुरा उल्लेख गर्दै समतामूलक समाज निर्माण गर्न उनीहरूले माग गरेका छन् । समाजमा रहेको असमान शक्तिको सम्बन्धमा परिवर्तन गर्नका लागि सरकारको भूमिका महत्वपूर्ण हुनुपर्ने भएकाले हिंसा न्यूनीकरण गर्नका लागि कानून निर्माणमा जोड दिनुपर्ने ओरेक मोरङकी कार्यक्रम अधिकृत गोमा भण्डारीले बताइन् ।
ओरेक, एबिसी नेपाल, सिबिन नेपाल, नारी विकास, ईन्सेक, कोकुन, डब्लु.एच.आर र माइती नेपालद्वारा संयुक्त रूपमा बुझाइएको ज्ञापनपत्रमा संविधानप्रद्त विभेद, शोषण र हिंसामुक्त जीवन यापन गर्न पाउने अधिकार सुनिश्चित गर्न माग गरिएको छ ।
हिंसा प्रभावितहरूले पनि आत्म सम्मानका साथ बाँच्न पाउनुपर्ने माग गर्दै राज्यले व्यवस्था गरेको लैंङ्गिक हिंशा न्यूनीकरण कोषलाई प्रभावकारी कार्यान्वयन गर्न भनिएको छ ।
कानूनले दण्ड मात्रै दिँदैन अनुशासन पनि सिकाउछ : मन्त्री कार्की
ज्ञापन पत्र बुझ्दै मन्त्री कार्कीले सामाजिक न्याय र समानताका लागि प्रदेश सरकारले काम गरिरहेको बताए ।
सामाजिक क्षेत्रमा काम गरिरहेका संघ संस्थाले समस्याको यर्थाथ पहिचान गरिरहेको भन्दै मन्त्री कार्कीले सामाजिक संस्थासँगै समन्वय गरेर सभ्य समाजको निर्माण प्रदेश सरकारले गर्ने बताए ।
‘कानून बनाउनु भनेको दण्ड दिनु भन्ने बुझाई आम मानिसमा रहेको छ,’ उनले भने, ‘त्यसले अनुशासन पनि सिकाउछ मानिसलाई ‘अवाएरनेस’ गराउने गर्दछ ।’
Discussion about this post