तरहरा : इटहरीमा रहेको सगुन कृषि सहकारी संस्था लिमिटेडले आफ्नो स्थापनाको १२ औं वर्ष मनाएको छ ।
बुधबार एक कार्यक्रमकाबीच सहकारीको डिपार्टमेन्ट स्टोर उद्घाटन समेत गरिएको छ । कार्यक्रमका प्रमुख अतिथि प्रतिनिधिसभा सदस्य सीताराम मेहताले रिबन काटेर डिपार्टमेन्ट स्टोरको उद्घाटन गरे ।
कार्यक्रममा बोल्दै मेहताले किसानको उत्पादनले बजारीकरण पाउनु सकारात्मक रहेको बताए ।
‘किसानले उत्पादन गरेका कृषिले उचित मूल्य नपाइरहेको अवस्थामा सहकारीमार्फत उपभोक्तासम्म उदेश्यले यसरी डिपार्टमेन्ट स्टोर सञ्चालन गर्नाले कृषक आत्मनिर्भर हुन्छन्,’ उनले भने, ‘हाम्रो देश कृषिप्रधान देश भनिएपनि अझैसम्म बाहिरी देशबाट निर्भर रहनुपर्ने अवस्था छ ।’
उनले योजनाबद्व तरिकाले कृषि क्षेत्रमा काम गर्नुपर्ने बताए । मेहताले भने, ‘अहिले जताततै प्लटिङ भनेको छ, पोल ठड्याइदिएको छ, तर जमिन चैँ बाँझो छ । जमिनको व्यवस्थापन गरिनुपर्छ ।’
उनले बाँझो जमिन रहेकाले त्यसको उचित व्यवस्थापन गरेको अवस्थामा आम मानिस आत्मनिर्भर बन्ने तर्क राखे । बाँझो रहेको जमिनमा तोरी, अदुवा, बेसार, फलफूल, तरकारीखेती गरिनुपर्ने बताउँदै उनले यस्ता सहकारीले किसानको हक हितमा गोलबद्व भएर काम गर्नुपर्ने बताए ।
कार्यक्रममा सगुन कृषि सहकारीका अध्यक्ष टीकादत्त बनका अनुसार २०६७ सालमा स्थापना भएको उक्त सहकारीले हाल इटहरी, तरहरा, झुम्का, इनरुवामा सेवा दिइरहेको छ । उनका अनुसार इनरुवामा कृषि यान्त्रीकरण परियोजना अन्तरगत कस्टम हायरिङ्ग सेवा केन्द्र पनि सञ्चालनमा रहेको छ ।
हाल ७५ जना कर्मचारी रहेको सहकारीको शेयरपुँजी दुई करोड ६० लाख र निक्षेप १२ करोड रहेको छ । यस्तै, सहकारी पसलमा दुई करोड बढी लगानी रहेको छ ।
‘सहकारीले बचत उठाउने र ऋण दिने भन्ने मात्रै बुझाइ भएकाले केही समय चुनौती पनि भयो,’ उनले भने, ‘हामीले यस डिपार्टमेन्ट स्टोरमा ३० हजार प्रकारका प्रोडक्ट राखेका छौँ, यहाँबाट नाफा भएको रकम सेयर सदस्यमा जानेछ ।’
उनका अनुसार यसबाट भएको नाफा समुदायमा जाने भएकाले अहिले डिपार्टमेन्ट स्टोरले थप सुविधा पनि ल्याएको छ ।
कार्यक्रममा चिरञ्जीवी तिम्सिना, हरिबहादुर कार्की लगायतले बोल्दै अब सहकारी पनि प्रविधिमैत्री हुनुपर्ने बताएका थिए ।
Discussion about this post