इटहरी : इटहरी उपमहामनगरपालिकामा गठबन्धनको तर्फबाट मेयर पदका उम्मेदवार हेमकर्ण पौडेलले अब यहाँका जनताले बाढीबाट ज्यान गुमाउन नपर्ने बताएका छन् ।
सोमबार इटहरीमा आयोजित लोकतान्त्रित गठबन्धनको चुनावी सभालाई सम्बोधन गर्दै नेता पौडेलले इटहरी सम्भावना बोकेको सहर भएपनि हरेक वर्ष बाढीले ज्यान गुमाउनुपर्ने भएपनि यसवर्षदेखि बाढीबाट कसैले पनि ज्यान गुमाउन नपर्ने बताएका हुन् ।
‘अब इटहरीमा आर्थिक अनियमितता र सुशासनका विषयमा प्रश्न उब्जने छैनन्,’ उनले भने, ‘इटहरीजस्तो समृद्ध सहरमा, सम्भावना बोकेको सहरमा बाढीले बगायो भन्नुपर्ने छैन, अस्पताल बन्ने कुरामा शंका छैन ।’
उनले यसअघि नेकपा एमाले नेतृत्व सरकारले उदासीनता देखाएका कारण इटहरीमा बाढीको क्षति निर्मूल हुन नसकेको बताउँदै अब गठबन्धनले जितेको अवस्थामा बाढी समाधान हुने बताएका हुन् ।
उनले आफूहरू इटहरीलाई साँच्चिकै बदल्ने सोचमा चुनावी मैदानमा आएको बताए ।
‘हामी इटहरीलाई साँच्चै बदल्ने सोचमा छौँ, तपाईँहरू पनि परिवर्तन चाहनुहुन्छ भने मत हाल्नेबेला मात्रै ३० सेकेन्ड दल परिवर्तन गर्नुहोस् र गठबन्धनलाई मत दिनुहोस्, हामी इटहरी बदल्छौँ ।’
उनले इटहरीमा यसअघि नेकपा एमाले निर्वाचित भएपनि दूरदर्शी नेतृत्व नभएको आरोप लगाए ।
उनले भने, ‘एमालेको नेतृत्व दूरदर्शी थिएन, यो जनताको दोष होइन । हिजोको दिनका सरकारदेखि जनता डराएर हिड्नुप¥या, अब सबै जाति, भाषाभाषीहरूले सरकार भएको महसुस गर्नेछन् ।’
उनले कांग्रेसले नेतृत्व गरेको गठबन्धन विजयी भएको अवस्थामा यहाँका आम सर्वहारा जनताले सरकार खोज्दै उपमहानगर आउन नपर्ने बताए ।
‘अब सरकार खोज्दै तपाईहरू उपमहानगरको गेटसम्म आउनुपर्दैन, यो सरकार जनमुखी हुन्छ, सरकार गाउँ–गाउँमा जनताका समस्या नियाल्न पुग्छ ।’ पौडेलले भने ।
बैशाख ३० गते हुने स्थानीय तहको निर्वाचनमा इटहरी उपमहानगरपालिकामा गठबन्धनको तर्फबाट मेयरमा नेपाली कांग्रेसका उम्मेदवार हेमकर्ण पौडेल र नेकपा एकीकृत समाजवादीबाट उपमेयरमा केशवकुमार विष्ट चुनावी मैदानमा छन् ।
Discussion about this post