इटहरी : इटहरी उपमहानगरपालिकाकी १९ वर्षीया किशोरीलाई करातेका प्रशिक्षकबाट बलात्कार भएको खुलेको छ ।
विराटनगर बसेर अध्यापन गर्दै आएकी किशोरीलाई करातेका प्रशिक्षकद्वय सुरज सुवेदी र विनोद राउतले बलात्कार गरेको खुलेको हो ।
मोरङ प्रहरीका प्रवक्ता डीएसपी दीपक श्रेष्ठका अनुसार आइतबार पक्राउ परेका उनीहरूमाथि अनुसन्धान गर्ने क्रममा किशोरीलाई जबरजस्ती करणी गरी भिडियो बनाएर पटकपटक बलात्कार गरेको खुलेको छ ।
डिसिप्लिन इन्चार्ज समेत रहेका सुवेदीले परीक्षामा सहयोग गर्ने बहानामा कोठामै जाने र शारीरिक सम्बन्ध राखेको खुलेको छ ।
पीडितका अनुसार सुवेदीले शारीरिक सम्बन्धको भिडियो पनि बनाए । र, सोही भिडियो देखाएर ‘ब्ल्याकमेलिङ’ गर्दै कहिले होटल त कहिले कोठामै पुगेर करणी गरेको प्रहरीको प्रारम्भिक अनुसन्धानबाट खुलेको छ ।
किशोरीमाथि करणी गर्ने अर्काे व्यक्ति पनि थपिए विनोद राउत । राउत र सुवेदी साथी हुन् । उनीहरू दुवैजना राष्ट्रिय खेलकुद परिषद्को मोरङमा कराते प्रशिक्षक छन् । आत्मरक्षा गर्न सिकाउने उनीहरूले किशोरीलाई पटकपटक करणी गरेको खुलेको डीएसपी श्रेष्ठले बताए ।
पछिल्लो पटक सुवेदीले भिडियो देखाएर गत असार २८ गते बलात्कार गरेको पीडित पक्षको दाबी छ । भिडियो खिचेको विषय चर्चामा आए पनि आरोपीको मोबाइलमा फेला नपरेपछि थप अनुसन्धान भइरहेको प्रहरीले जनाएको छ ।
भिडियो खिचेको थाहा पाएपछि घटना बाहिर आउने डरले किशोरीले घटनाबारे गुपचुप नै राखेकी थिइन् । तर, पछिल्लो समय कलेज नजाने तथा नैराश्यता भएका कारण परिवारले सोधपुछ गर्दा घटना बाहिरिएको प्रहरीले जनाएको छ ।
घटना थाहा पाएपछि पीडित परिवारले प्रहरीमा उजुरी गरेसँगै सुवेदीलाई पक्राउ गरेको थियो । प्रहरीले सुवेदीको बयानमार्फत राउतलाई पनि पक्राउ गरेको हो । प्रहरीले ‘जबरजस्ती करणी’मुद्दामा मोरङ जिल्ला अदालतबाट म्याद थप गरेको छ । मंगलबार प्रहरीले दोस्रो पटक दुई दिनको म्याद थपेर अनुसन्धान गरिरहेको छ ।
डीएसपी श्रेष्ठले हाल पीडित किशोरीको अवस्था गोप्य राखेकाले थप बताउन नमिल्ने र घटनाबारे अनुसन्धान भइरहेको जानकारी दिए ।
यो पनि – विराटनगरमा किशोरीमाथि सामूहिक बलात्कार, करातेका दुई प्रशिक्षक पक्राउ
Discussion about this post