इटहरी : खेलकुदको पर्याप्त सम्भावना र पूर्वाधार हुँदाहुँदै पनि इटहरीलाई ‘स्पोर्ट्स सिटी’ घोषणा गर्न नसक्दा खेल क्षेत्रले धेरै अवसर गुमाएको खेल क्षेत्रका अगुवाहरूले बताएका छन् ।
स्थानीय सरकारले स्पष्ट नीति, पर्याप्त बजेट र योजनाबद्ध कार्यक्रम बनाएर खेलकुद विकासलाई प्राथमिकता दिनुपर्ने उनीहरूको जोड छ ।
सञ्चारपाटी डटकमको आयोजना तथा राष्ट्रिय जागृति क्लब इटहरीको संयोजनमा आयोजित ‘इटहरीमा खेलकुदको भविष्य : पूर्वाधार, नीति र गतिविधि’ विषयक अन्तरक्रियामा यस्तो सुझाव दिइएको हो ।
खेल पत्रकार अर्जुन सुवेदीले इटहरीको खेलकुदको विगतदेखि वर्तमान सम्मको अवस्था, सम्भावना र चुनौति बारे प्रस्तुति दिए । त्यस्तै अभियन्ता हिमाल दाहालले भोलिको इटहरी अभियान र कार्यक्रमको उद्देश्य बारे जानकारी दिए ।
कार्यक्रममा सहभागी खेल क्षेत्रका अग्रज, खेलाडी, प्रशिक्षक, खेल पत्रकार तथा अन्य सरोकारवालाहरूले पर्याप्त सम्भावना भए पनि योजनाबद्ध विकास हुन नसकेको बताए । उनीहरुले खेल एकेडेमी बनाउनुपर्ने, नियमित प्रतियोगिता गर्नुपर्ने माग राखे ।
कार्यक्रमका संयोजक राष्ट्रिय जागृति क्लबका अध्यक्ष केशव कार्कीले इटहरीमा खेल पूर्वाधार बने पनि त्यसको प्रभावकारी व्यवस्थापन हुन नसकेको बताए । समग्र योजना र नीति बन्न नसक्दा हिजोको खेलको इतिहास कायम राख्न नसकेको यथार्थ अवस्था बताए ।
कार्कीले खेलाडी र खेल संस्थाहरुले आर्थिक समस्याको सामना गर्नु परेको बताउँदै सबै खेललाई अघि बढाउनका साझा योजना आवश्यक परेको बताए ।
कार्यक्रममा राष्ट्रिय खेलकुद परिषदका पूर्व सदस्य सचिव केशव बिष्टले इटहरीको खेलकुद विकासका लागि विगतमा भएका निर्णय र सम्भावनालाई पुनः कार्यान्वयनमा ल्याउनुपर्ने बताए ।
इटहरी रंगशालाका लागि विगतमा नेपाल सरकारले १६ बिघा जग्गा उपलब्ध गराउने निर्णय भए पनि तत्काल ८ बिघा मात्र उपलब्ध भएको र थप संरचना निर्माण भए बाँकी जग्गा उपलब्ध गराउने विगतको निर्णयलाई कार्यान्वयन गर्न इटहरीले दबाब दिनुपर्ने बताए ।
कार्यक्रममा उपस्थित भएका विभिन्न खेल विधाका अग्रजहरुले आफ्ना धारणा राखे । उनीहरुले इटहरीको खेलकुद विकास गर्न स्थानीय तहले गर्नुपर्ने काम बारे सुझाव दिएका छन् ।
Discussion about this post