इटहरी : सुनसरीको क्षेत्र नं. २ (क) मा नेपाली कांग्रेसका वडा सभापतिले बागी उम्मेदवारी दिएका छन् ।
इटहरीका १० वटा वडासहित रामधुनीको २ वटा पर्ने कांग्रेस क्षेत्र नं. २ (क) मा प्रदेशसभा सदस्यमा नेपाली कांग्रेस इटहरी २ का सभापति समेत रहेका दीपेन्द्र घिमिरेले बागी उम्मेदवारी दिएका हुन् ।
आगामी ४ मंसिरमा हुने प्रदेशसभा तथा प्रतिनिधिसभाको निर्वाचनका लागि आइतबार मनोनयन दर्ता थियो । घिमिरेले सुनसरी सदरमुकाम इनरुवास्थित निर्वाचन अधिकृतको कार्यालयमा प्रदेशसभा सदस्यको उम्मेदवारी दर्ता गराएका हुन् ।
‘इटहरीमा कांग्रेसको ठूलो संगठन हुँदाहुँदै पनि दुवै क्षेत्रमा माओबादीलाई उम्मेदवार बनाएकाले मैले स्वतन्त्र उम्मेदवारी दर्ता गराएको हुँ,’ घिमिरेले टाकुरान्यूजसँग भने, ‘हिजोका दिनमा द्वारिकलाल चौधरी इटहरीको मेयर हुँदै गर्दा उनका गतिविधि ठीक नभएकाले हामीले राजीनामा मागेका थियौँ, आज उनैलाई कसरी मत माग्दै हिड्नु ?’
उनले पार्टीको आधिकारिक निर्णय भएपनि विगतका दिनमा विवादास्पद छवि बनाएका द्वारिकलाललाई आफूहरूले मत माग्न नसकिने उनको बुझाई छ । उनले भने, ‘हिजो उनका गतिविधिविरुद्ध कांग्रेसले विरोध गरेको हो, आज तिनै द्वारिकलाल सही छन् भनेर जनता समक्ष कसरी मत माग्ने ?’
गत बैशाखमा भएको स्थानीय तहको निर्वाचनमा नेपाली कांग्रेसबाट इटहरी २ मा वडाध्यक्षको दाबी गर्दै आएका घिमिरेलाई पार्टीले टिकट दिएको थिएन । यसपटक भने सुनसरी २ (क) मा गठबन्धन भएपनि कांग्रेसले नै दाबी गर्दै आएको थियो ।
तर, एक साता अगाडि मात्रै एमालेबाट माओबादी केन्द्र प्रवेश गरेका द्वारिकलाल चौधरीलाई निर्वाचनमा अगाडि सारेपछि कांग्रेस असन्तुष्ट छ ।
उता, इटहरीका १० वटा वडा पर्ने सुनसरी क्षेत्र नं. ३ (क) मा पनि गठबन्धनले माओबादी केन्द्रलाई नै टिकट दिएपछि इटहरीका कांग्रेस नेता तथा कार्यकर्ता पार्टी नेतृत्वप्रति रुष्ट छन् ।
स्थानीय निर्वाचनमा इटहरी उपमहानगरपालिकामा कांग्रेसले मेयर जितेको छ । २० वटा वडा रहेको यहाँ वडा सदस्य समेत नजितेको माओबादी केन्द्रलाई दुवै क्षेत्रमा टिकट दिनुले आफूहरू निरुत्साहित भएको कांग्रेसका नेताहरूले बताउँदै आएका छन् ।
यो पनि – इटहरीमा पर्ने प्रदेशसभाको निर्वाचन क्षेत्रमा कांग्रेसले टिकट नपाएपछि असन्तुष्ट
Discussion about this post