इटहरी : इटहरीमा पर्ने प्रदेशसभाको निर्वाचन क्षेत्रमा कांग्रेसको भागमा टिकट नपरेपछि कार्यकर्ताहरूले असन्तुष्ट व्यक्त गरेका छन् ।
सुनसरी क्षेत्र नं. २ (क) र क्षेत्र नं. ३ (क) मा माओबादीलाई टिकट दिएपछि कांग्रेसभित्र असन्तुष्ट चुलिएको हो ।
इटहरीमै पर्ने दुवै क्षेत्रमा कांग्रेसले दाबी गर्दै आएपनि अप्रत्याशित रूपमा टिकट पाएपछि कांग्रेसभित्र असन्तुष्ट भएको हो ।
स्थानीय निर्वाचनमा इटहरी उपमहानगरपालिकामा कांग्रेसले मेयर जितेको छ । २० वटा वडा रहेको यहाँ वडा सदस्य समेत नजितेको माओबादी केन्द्रलाई टिकट दिनुले आफूहरू निरुत्साहित भएको कांग्रेसका नेताहरू बताउँछन् ।
इटहरीको १ देखि ५, १६ देखि २० नम्बर वडा र रामधुनीको ३ र ५ नम्बर वडामा पर्ने क्षेत्र नं. २ (क) मा नेपाली कांग्रेसका भीमबहादुर पौडेलले दाबी गर्दैै आएका थिए ।
तर, इटहरीका निवर्तमान मेयर तथा नेकपा एमाले सुनसरीका पूर्व अध्यक्ष समेत रहेका द्वारिकलाल चौधरी माओबादी केन्द्र प्रवेश गरेपछि कांग्रेसको टिकट खोसिएको हो ।
उता, इटहरीको ६ देखि १५ नम्बर वडामा पर्ने सुनसरी ३ (क) मा पनि माओबादीकै भाग परेपछि यहाँका कांग्रेस कार्यकर्ता नेतृत्वप्रति रुष्ट भएका छन् । यहाँ माओबादीकी सरस्वती पोखरेलले टिकट पाएकी छन् । उनी प्रदेश १ की उपसभामुख समेत हुन् ।
दुवै क्षेत्रमा कांग्रेसले टिकट नपाउनुले आफूहरूमाथि अपमान भएको नेपाली कांग्रेस इटहरीका नेता विकास केसीले बताए ।
‘इटहरी पूर्वकै केन्द्रबिन्दु सहर हो, गाउँमा माओबादीबाट पीडित भएकाहरू पछिल्लो समय इटहरी आएकाले कांग्रेसमा विश्वास राख्ने जनता थिए,’ उनले भने, ‘इटहरीमा कांग्रेसको सबैभन्दा ठूलो संगठन भएपनि उम्मेदवार नपर्नुले कार्यकर्ताको मनोबल गिरेको छ ।’
उनले इटहरीलाई प्रतिनिधित्व गर्दै समानुपातिकमा पनि कसैको नाम नपर्नुले आफूहरूलाई अपमान महसुस भएको बताए ।
Discussion about this post