इटहरी : विराटनगरमा अपहरणपछि हत्या गर्ने तीनजनालाई प्रहरीले पक्राउ गरी सार्वजनिक गरेको छ ।
सिरहाको गोलबजार ३ का १७ वर्षीय अंशु सदाको हत्यामा संलग्न तीनजनालाई प्रहरीले पक्राउ गरी सार्वजनिक गरेको हो ।
१ नम्बर प्रदेश प्रहरी कार्यालय विराटनगरका प्रहरी उपरीक्षक (एसपी) नवीनराज राईका अनुसार पक्राउ पर्नेमा कमला नगरपालिका ६ धनुषाका १८ वर्षीय राकेश ठाकुर, सोही स्थानका १८ वर्षीय विशु भन्ने प्रशान्त मण्डल र रतुवामाई नगरपालिका ५ मोरङका २६ वर्षीय मनोज कार्की रहेका छन् ।
विशेष सूचनाको आधारमा जिल्ला प्रहरी कार्यालय मोरङ र प्रदेश प्रहरी कार्यालय विराटनगरको अनुसन्धान समूहबाट खटिएको प्रहरी टोलीले विराटनगरबाट उनीहरूलाई पक्राउ गरेको हो ।
चारदिनअघि सदालाई अपहरण गरी अपहरणकारीले एक लाख रुपैयाँ फिरौती मागेका थिए । फिरौती नदिँदा उनको हत्या भएको प्रारम्भिक अनुसन्धानमा खुलेको एसपी राईले बताए ।
सदाको इँटाले मुखमा हानेर २७ गते साँझको समयमा कोठाभित्रै हत्या गरेपछि शवलाई बक्स पलङ भित्र हालेर भाग्ने कोसिसमा रहेका तीनजनालाई प्रहरीले पक्राउ गरी सार्वजनिक गरेको हो । प्रहरीले विराटनगरको न्यू अप्सरा गेष्ट हाउसको कोठा नं. १ मा मृतक अवस्थामा सदाको शव फेला पारेको थियो ।
एसपी राईका अनुसार सदाको परिवारले अपहरण भएकोे तीन दिनपछि बिहीबार इलाका प्रहरी कार्यालय गोलबजारमा निवेदन दिएका थिए ।
प्रहरीमा उजुरी गरेपछि अंशुको परिवारले फिरौती मागेको मध्येबाट तत्कालका लागि भन्दै १० हजार रुपैयाँ मनोज कार्कीको माछापुच्छ्रे बैंकको खातामा हालिदिएका थिए । उनीहरू अप्सरा गेष्ट हाउसमा भने असोज २६ गते आएको र एक साता बस्ने भन्दै कोठा बुक गरेको प्रारम्भिक अनुसन्धानबाट खुलेको राईले बताए ।
शुक्रबार बिहान कोठा सफा गर्न जाँदा होटलका कर्मचारीलाई भित्र समेत पस्न नदिएको प्रारम्भिक अनुसन्धानले देखाएको छ । पक्राउ परेकाहरूमाथि थप अनुसन्धान भइरहेको प्रहरीले जनाएको छ ।
यो पनि_विराटनगर : एक लाख फिरौती माग्दा नदिएपछि अपहरण गरिएका किशोरको हत्या
Discussion about this post