इटहरी : सुनसरी क्षेत्र नं. ३ बाट प्रतिनिधिसभा सदस्यकी उम्मेदवार रहेकी भगवती चौधरीलाई निर्वाचन आयोगले स्पष्टीकरण सोधेको छ ।
बिहीबार इटहरी उपमहानगरपालिका वडा नं. १४ मा आयोजित चुनावी भेटघाट कार्यक्रममा बोल्दै चौधरीले धाँधली गर्न खोज्नेलाई ‘गोली चलाउने र छुरा रोप्ने धम्की’ दिएकी थिइन् ।
‘जनताको मतलाई सुरक्षित रूपले गन्न नदिने काम गरियो भने त्यसको परिणाम अथवा जवाफ दिनको लागि हामी तयार छौँ,’ चौधरीले कार्यक्रममा भनेकी थिइन्, ‘त्यसलाई भोलि, पर्सि हुनसक्छ भने गोली नै ठोक्नुप¥यो भने छुरै हान्नुप¥यो भने भगवती चौधरी त्यो पनि तयार छु ।’
उनले चुनावताका युवा संघ, युथ फोर्स, महिला संघ, किसान संघ लगायतका भातृ संगठनलाई तयार रहन समेत संकेत गरेकी थिइन् ।
एमालेबाट प्रतिनिधिसभा सदस्यकी उम्मेदवार रहेकी चौधरीलाई आयोगले आइतबार स्पष्टीकरण सोधेको आयोगका प्रवक्ता शालिग्राम शर्मा पौडेलले जानकारी दिए ।
‘निर्वाचन आचारसंहिता लागू भइसकेको विषयको सन्दर्भमा तपाईंले निर्वाचन आचारसंहिताको विपरीत हुनेगरी अभिव्यक्ति दिनुभएकाले यो पत्र तपाईंलाई कुनै माध्यमबाट प्राप्त भएको २४ घन्टाभित्र निर्वाचन आयोग वा जिल्ला निर्वाचन कार्यालय, सुनसरीमा प्राप्त हुने गरी स्पष्टीकरण पेस गर्न निर्देशन दिइएको छ,’ आयोगले सोधेको स्पष्टीकरणमा भनिएको छ, ‘स्पष्टीकरण पत्रमा निर्वाचनमा मतदातालाई स्वतन्त्र रूपमा मतदान गर्न पाउने अन्तरनिहित हक रहेको सन्दर्भमा तपाईंबाट निर्वाचनको स्वच्छता र निष्पक्षतामा नकारात्मक प्रभाव पर्ने गरी दिइएको धम्कीपूर्ण तथा हिंसाउद्धत गराउने अभिव्यक्ति तपाईंले नै दिएको होइन भन्ने आधार र कारण के छ ?’
निर्वाचन आचारसंहिता, २०७९ को दफा ४ को खण्ड (न) मा ‘कुनै प्रकारले निर्वाचनको स्वच्छता वा निष्पक्षतालाई प्रभावित गर्ने गरी कुनै कार्य गर्न नहुने’ व्यवस्था छ।
साथै निर्वाचन आचारसंहिता, २०७९ को दफा १३ को उपदफा ९१० को खण्ड (फ) मा ‘उम्मेदवार तथा निजको परिवारलाई कुनै तवरबाट डर, त्रास तथा धम्की दिन नहुने’ व्यवस्था छ।
Discussion about this post