अहिले म निःशब्द छु
जो पनि निःशब्द छ यहाँ ।
शब्दहरूको ज्योति निष्प्रभ भइसकेको छ
पन्छी अब गीत गाउँदैनन्,
अथाह अन्धकारमा हराइसकेको छ तिनको गुन्जन … ।
तीखा चट्टानहरूमा खसेर टुटिसकेका छन्
झरनाहरूका करङका हड्डी,
आस्थाका फूल ओइलाएका छन् फाँट–मैदानहरूमा
मदनमोहनलाई पिङमा एक्लै छाडेर,
भक्तहरू फर्किसकेका छन् मधुशालामा
र झुटका धागाले बनेका थिए जुन मुखुन्डा
ती अब सबका सब झरिसकेका छन् ।
बारका यतापट्टि
अब खालि
यताउताछरिएका पदचिह्न छन् ।
अनि रगतका सुकेका धब्बा…
अनि ताता आँसु ।
भोक र भयले बनेका पुतलाहरू
अनि अनन्तसम्म व्याप्त एक सन्नाटा ।
मैनको एक पुतला पग्लिइरहेको छ यतिखेर
आफ्नै तातो आहतले ।
गर्भगृहमा अरू कोही छैन ऊबाहेक,
केही छैन यता पनि,
सायद
कहिल्यै केही छँदै थिएन ….।
सायद
यहीँबाट फर्कनु छ मलाई,
तिमीलाई,
हामी सबैलाई….
सायद यहीँबाट
हाम्रो वनवास सुरु हुन्छ ।
यसअघि पनि
केही मानिस यहाँबाट फर्किसकेका छन् ।
यसै विरामचिह्नलाई अन्तिम सम्झेर,
यहीँ छाडे उनीहरूले
शिशुको रुवाइजस्तो निर्मल स्वर निकाल्ने एक बाँसुरी,
रगतले भिजेका केही हतियार,
केही हड्डीहरू जुनबाट नयाँ वज्र बन्नु थियो,
अनि केही शब्द,
जसबाट
नियति लेखिनुथियो हाम्रो ।
हेर, यहीँ छाडेर गएका छन् तिनले,
अनेक “आरम्भ”…..
अनि यहीँ,
अनन्तकालदेखि गुन्जिइरहेको छ
कसैको छिनोको आवाज ।
बन्द एक कोठामा,
कोही केही खोजिरहेको छ
सयौँ वर्षदेखि,
सारा निर्माण
अझसम्म अपूर्ण छन् ।
कसैको छिनो
रोकिएको छैन ।
समय कोल्टे फेर्न सक्छ जहिले पनि,
तयार रहनू ।
०००
(आसूर्यस्नात त्रिपाठी (जन्म १९९१) ओडिया भाषाका चर्चित युवा कवि हुन् । कविता–कृति “ए सम्पर्क एमिति” का लागि २०१७ मा साहित्य अकादमी युवा पुरस्कार जित्न सफल यिनी ओडिया, हिन्दी र अङ्ग्रेजीमा लेख्ने गर्छन् ।
पेसाले एक इन्जिनियर सूर्यस्नात त्रिपाठी कवि, कथाकार र नाटककार हुन् । ओडिया भाषामा लेखिएका पाँच कविताकृति र आधुनिक हिन्दी साहित्यका प्रख्यात लेखक धरमवीर भारतीको कृति ‘अनुप्रिया’लाई ओडिया भाषामा अनुवाद गरिएको एक गरेर उनको नाममा छ कृति प्रकाशित छन् । उनी छोटा फिल्म र फिचरहरूका लागि पटकथा, स्क्रिप्ट र संवादसमेत लेख्छन् ।
हाल उनी हैदराबादस्थित भारतीय प्रविधि प्रतिष्ठानमा पोस्ट डक्टरल फेलोका रूपमा कार्यरत छन् ।
प्रस्तुत कविता मूल हिन्दीबाट दिनेश पौडेलले नेपालीबाट अनुवाद गरेका हुन् । एसओएस बालग्रामका पूर्वशिक्षक पौडेल उपन्यासकार र कुशल कृतिसम्पादक हुन् । उनले हालै “कुशल अभिभावक : सफल छोराछोरी” नामको अभिभावक शिक्षासम्बन्धी कृति बजारमा ल्याएका छन् ।)
Discussion about this post