विराटनगर : प्रदेश १ को नाम ‘कोसी’ बहुमतले पारित भएको छ ।
बुधबार प्रदेश १ को प्रदेशसभामा पेस भएको नामकरणमा ‘कोसी’ प्रदेश राख्ने बहुमतले पारित भएको हो ।
नेकपा एमालेका रामबहादुर राना मगरले प्रस्ताव गरेको ‘कोसी’ मा एमाले सांसदद्वय विदुर लिंथेप र नेकपा एमालेका नीरन राईले समर्थन गरेका थिए ।
प्रदेश १ को प्रदेशसभाले प्रदेशको नामकरण सम्बन्धी प्रस्ताव पारित गरेसँगै अब ‘कोसी’ प्रदेश रहने भएको छ ।
बुधबार (आज) साँझ भएको मत विभाजनमा पक्षमा कोसीको ८२ मत परेको थियो । यस्तै, विपक्षमा ४ मत परेको थियो भने ६ जना सांसद अनुपस्थित रहे । मतदानमा ८६ जना सांसद सहभागी थिए।
सभामुख बाबुराम गौतमले ‘कोसी’ नाममा बहुमत भएकाले प्रदेश १ को नाम ‘कोसी’ रहने घोषणा गरे । विपक्ष भन्दा पक्षको बहुमत रहेकाले प्रदेशको नाम ‘कोसी’ घोषणा गरिएको सभामुख गौतमले बताए ।
प्रदेश १ कूल ९३ जना सांसद छन् । जसमध्ये नामकरणको टुंगो लगाउन ६३ जना सांसद आवश्यक पर्छ । प्रदेश १ प्रदेशसभामा एमालेका ४०, नेपाली कांग्रेसका २९, माओवादीको १३, राप्रपाको ६, नेकपा एसको ४ र जसपाको १ जना सांसद छन् ।
Discussion about this post