इटहरी : विधेयक पास गर्ने सवालमा एमालेबाट विजयी जनप्रतिनिधि असन्तुष्ट भएर स्थगित भएको इटहरी नगरपालिकाको १२ औं नगरसभा तीन सातापछि सातवटा विधेयक पास गर्दै टुंगिएको छ ।
फागुन २७ गतेदेखि सुरु भएर चैत ३ गतेदेखि अनिश्चितकालीन समयका लागि स्थगित भएको नगरसभा दुई पक्षीय सहमतिका आधारमा सोमबार भएको हो ।
नगरसभाले विनियोजन ऐन संशोधन विधेयक २०७९, इटहरी उपमहानगरपालिकाको केही ऐन संशोधन गर्न बनेको विधेयक २०७९, रात्री बजार सञ्चालन सम्बन्धमा व्यवस्था गर्न बनेको विधेयक २०७९ र बजार अनुगमन सम्बन्धमा व्यवस्था गर्न बनेको विधेयक २०७९ पारित गरेको हो ।
यस्तै, नगर खेलकुद विकास सम्बन्धमा व्यवस्था गर्न बनेको विधेयक २०७९, कर्मचारी आचारसंहिता सम्बन्धमा व्यवस्था गर्न बनेको विधेयक २०७९ र शिक्षा सम्बन्धमा व्यवस्था गर्न बनेको विधेयक २०७९ छलफल पश्चात पारित गरिएको हो ।
पारित भएका विधेयकमध्ये कर्मचारी आचारसंहिता सम्बन्धमा व्यवस्था गर्न बनेको विधेयक २०७९ मा एमालेबाट विजयी जनप्रतिनिधिले असन्तुष्टि जनाएका थिए ।
तर, सोमबार बसेको कार्यपालिका बैठकले अघिल्लो पटक असन्तुष्ट जनाएको कुनैपनि कुरालाई विना संसोधन सहज ढंगले पारित भएको मेयर हेमकर्ण पौडेलले बताए ।
अघिल्लो बैठक (चैत ३ गते) मै कर्मचारी सम्बन्धि विधेयको विषयमा इटहरीमा क्रियाशील राजनीतिक दलको नेतृत्वबीच सहमति भएकै आधारमा नगरसभाबाट टुङ्ग्याउने योजना रहेको थियो ।
यद्यपि, नगरसभाका क्रममा एमालेबाट विजयी जनप्रतिनिधि हाजिर गरेर निस्किएपछि मेयर पौडेललले अनिश्चितकालका लागि नगरसभा स्थगित भएको घोषणा गरेको थिए ।
त्यसलगतै उनले सामाजिक सञ्जाल फेसबुकमा पनि नगरसभा स्थगित हुनुका कारण र कर्मचारीलाई व्यवस्थापन गर्ने ऐन पारित गर्ने सवालमा दलहरुबीच सहमति भएको बारेमा प्रष्ट्याएका थिए ।
नगरसभा स्थगित भएको एक सातापछि एमालेबाट निर्वाचित प्रतिनिधिहरूले पत्रकार सम्मेलन गरी मेयर पौडेलले एमालेमाथि लाञ्छना लगाएको आरोप समेत लगाएका थिए ।
तर, लामो रक्साकस्सीपछि दुवै पक्षबाट सहमति भएर विधेयक पास भएको हो ।
Discussion about this post