बराहक्षेत्र : बराहक्षेत्र नगरपालिका वडा नं. ८ स्थित शिवशक्ति चौकबाट जीतपुर हुँदै भण्डारी चौकसम्मको सडक कालोपत्रे हुने भएको छ ।
सहरी विकास मन्त्रालयको योजना अनुसार संघीय इकाई कार्य आयोजना विराटनगर अन्तरगत निर्माणाधीन योजना अनुरुप उक्त सडक कालोपत्रे हुने बताइएको छ ।
ग्रामीण सडकको रूपमा रहेको उक्त सडक रामधुनी र बराहक्षेत्र चक्रघट्टी जोड्ने योजना अन्तर्गत पूर्वमन्त्री ज्ञानेन्दबहादुर कार्कीको पहलबाट सुरु भएको थियो ।
रामधुनीको बैढारदेखि सुरु भएको योजना हाल बराहक्षेत्र नगरपालिकाको शिवशक्ति चौकसम्मको सडक कालोपत्रे सम्पन भइसकेको छ ।
शिवशक्ति चौकदेखि जीतपुर हुँदै भण्डारी चौकसम्मको सडक कालोपत्रेका लागि बिहीबारबाट प्राविधिकहरूले काम सुरु गरेको नगर प्रमुख रमेश कार्कीले बताए ।
योजनालाई सम्पन बनाउन संघीय ईकाई कार्य आयोजना, निर्मांण कम्पनीसँग समन्य सुरु गरिएको नगर प्रमुख कार्की बताउँछन् ।
शिवशक्ति चोक देखि जीतपुर हुँदै भण्डारी चौकसम्म करिब एक किलोमिटर, ४ सय मिटर बाटो कालोपत्रे तत्काल हुनेछ ।
सडकको नगर प्रमुख कार्कीसहित वडा नं. ८ का वडाध्यक्ष रोशन खड्का ,सहरी विकासका इन्जिनियर र निर्माण कम्पनीका प्राविधिकले निरीक्षण गरेका थिए ।
यस्तै, बराहक्षेत्र ८ स्थित कालापानीमा सुनसरी मोरङ्ग सिचाईँ योजना अन्तरगको नहरमा निर्माण भएको पुलको समेत उद्घाटन गरिएको छ ।
मेयर कार्कीले उक्त पुलको उद्घाटन गरेका हुन् । नगरपालिकाको चालू आर्थिक वर्षको सात लाख ५० हजारबाट उक्त पुल उपभोक्ता समितिमार्फत निर्माण भएको वडाध्यक्ष रोशन खड्काले बताए ।
Discussion about this post