धरान : धरानमा दर्ताबिनै सञ्चालित ल्याब र एक्सरे मेसिन सिल गरिएको छ ।
सरोकारवाला निकायमा दर्ता नगरी स्वास्थ्यसम्बन्धी विभिन्न जाँच गर्ने ल्याब उपकरण तथा एक्सरे मेसिन राखेर मेडिकल हल, डाइग्नोस्टिक सेन्टर सञ्चालन गर्ने आधा दर्जन व्यापारिक स्वास्थ्य संस्थालाई धरान उपमहानगरपालिका तथा राजस्व अनुसन्धान कार्यालयले बिहीबार कारबाही गरेको हो ।
अनुगमनको क्रममा चरम लापरबाही देखिएपछि कारबाहीमा पर्नेमध्ये धरानकै सबैभन्दा पुरानो मेडिकल हल धरान औषधालयका सञ्चालक डा. तपन तरफदारले समेत दर्ता प्रमाणपत्र र राजस्व छली गरेको पाइएको छ ।
उनले धरान २ छाता चोकस्थित धरान औषधालयमा अनुमति नलिई ल्याब सञ्चालन गरेको र बिल बिजकसमेत नराखेपछि ल्याब सिल गरिएको धरान उपमहानगरपालिकाका बजार अनुगमन अधिकृत वेदप्रसाद सापकोटाले बताए ।
उनका अनुसार वर्षौंदेखि अनुमति नै नलिई ल्याब सञ्चालन गरिरहेको पाइएपछि तत्काललाई सिल गरिएको हो ।
‘२०७४ देखि प्रमाणपत्रसमेत नवीकरण नगरेको पनि पाइयो,’ अधिकृत सापकोटाले भने, ‘उनलाई सबै कागजात दुरुस्त राख्न निर्देशन दिइएको छ । ल्याब दर्ता गरेपछि मात्र सञ्चालन गर्न निर्देशन दिइएको छ ।’
टोलीले छाताचोक आसपासमा रहेका गीता राईको गार्जियन डाइग्नोस्टिक सेन्टर, सोहन झाको मोर्डन डाइग्नोस्टिक सेन्टर, बलराम विकको धरान मेडिकल, काजी गुरुङको नेसनल डाइग्नोस्टिक सेन्टर, लालुप्रसाद यादवको सुनसरी पोलोक्लिनिक एन्ड डाइग्नोस्टिक सेन्टर, सुरेशकुमार यादवको अनिता फार्मेसीलाई पनि कारबाही गरेको छ ।
बिरामी उपचारको नाममा दर्ता नगरी ल्याब र एक्सरे राखेर चर्को शुल्क लिने सबै व्यापारिक स्वास्थ्य मेडिकल हल, पोलिक्लिनिक, डाइग्नोस्टिक सेन्टरलाई तोकिएको मापदण्ड पूरा गरेर मात्र सञ्चालन गर्न निर्देशन दिएको छ ।
Discussion about this post