इटहरी : चितवन राष्ट्रिय निकुञ्जबाट ल्याइएका पुष्पा र अञ्जली नामक गैँडालाई कोसी टप्पु वन्यजन्तु आरक्षमा स्थानान्तरण गरिएको छ । पुष्पा र अञ्जलीलाई चितवनबाट दुई अलग खोरमा राखेर कोसी टप्पु ल्याइपुर्याइएको हो ।
कोसी टप्पु वन्यजन्तु आरक्ष अन्तर्गतको मध्यवर्ती क्षेत्रमा आज दुईवटा गैँडा पहिलोपटक छाडिएको हो ।
विश्व पर्यटन दिवसको अवसरमा चितवनस्थित राष्ट्रिय निकुञ्जबाट सप्तरी ल्याइएको दुईवटा पोथी गैँडा पुष्पा र अञ्जलीलाई वन तथा वातावरण मन्त्री डा. वीरेन्द्रप्रसाद महतोले स्वागत गर्दै गैंडा खोरमा प्रवेश गराएका हुन् । चितवनबाट ट्रकमा लोड गरेर सप्तरी ल्याईएको दुवै गैंडालाई ७ घण्टापछि आरक्षको खोरमा प्रवेश गराईएको हो ।
कोसी टप्पु वन्यजन्तु आरक्ष क्षेत्रमा विभागका तत्कालीन उपमहानिर्देशक वेदकुमार ढकाल नेतृत्वको प्राविधिक समितिले गरेको अध्ययनबमोजिम गैँडाको बाँसस्थलकोलागि उपयुक्त ठाउँ भएको सिफारिशको आधारमा पुष्पा र अञ्जलीलाई सप्तरी ल्याईएको हो ।
यसअघि दुवै गैँडालाई माउबाट छुटिएको अवस्थामा उद्धार गरेपछि गत बैशाख ३१ गतेदेखि चितवन निकुञ्जकै लामिताल क्षेत्रमा राखिएको थियो ।
अहिले पुष्पा करिब ४ वर्षको र अञ्जली अढाई वर्ष उमेरका छन् ।
Discussion about this post