इटहरी – २० तरहरामा असारे विकास भएको स्थानीयले गुनासो गरेका छन् ।
तरहराको जनसहयोग स्कूल नजिकैदेखि मौलिहा जाने करीब १ किलोमिटर बाटो विकासको नाममा असारे विकास भएको स्थानीयले आरोप लगाएका हुन् ।
स्थानीयका अुनसार तरहराको प्रगति टोल, गुलेलीटार देखि मौलिहा सम्म जाने करीब एक किलोमिटर बाटोमा माटो हालेपछि पानी जमेर दह भएको छ ।
स्थानीय साबित्रा भाडरीका अनुसार यहाँ माटो हालेपछि पानी जमेर हिड्न नसकिने स्थिति छ । उनले बारीमा हाल्ने माटो सडकमा हालेपछि अहिले हिड्दै आएको बाटो पूर्ण रुपमा बन्द भएको अवस्था रहेको बताईन् । ‘यहाँ त धान रोप्दा हुनेजस्तो स्थिति भयो,’ उनले ब्यङ्ग्यात्मक रुपमा भनिन्, ‘हिड्दै गरेको बाटो विकासको नाममा बजेट सक्ने स्थिति भयो ।’
स्थानीय भोला आचार्यले पनि हिड्दै आएको बाटोमा बिकासको नाममा माटो हालेपछि अहिले हिड्न नै बन्द भएको बताए । उनले टाकुरान्यूजसँग भने, ‘हिजोअस्ति सम्म राम्रो भएको बाटोमा अहिले न एम्बुलेन्स, दमकल हिड्न सक्ने स्थिति छ, धेरै समस्या भयो, यो चैँ असारे विकास जस्तै भयो, धान रोप्न हालेजस्तो भयो ।’
‘नयाँ बजेट सुरु भएपछि पुरानो बजेट सकाउँनका लागि आँखामा छारो हाल्ने काम भएको छ,’ स्थानीय रवि राईले भने, ‘यहाँ मात्रै नभएर यहाँका धेरै ठाउँमा बाटो यस्तै छ, साइकल पनि काँधमा लिएर हिड्नुपर्ने अवस्था छ ।’
उनले काम राम्रोसँग नभएको बताउँदै बजेट सकाउँने काम भएकोप्रति खेद प्रकट गरे । उनले भने, ‘समय रहन्जुले विकास गर्नुपर्छ भन्ने कुरै भएन, मिसगिटी हाल्नुपर्ने ठाउँमा माटो हालेको अवस्था छ ।’
धेरैबर्षदेखि बनाउँने भनिएपनि बाटो नबनेको तर अहिले बाटो बनाउँने नाममा माटो हालेर स्थानीयको आँखामा छारो हाल्ने काम भएको उनले बताए ।
स्थानीयले लामो समयदेखि बन्ने भनिएको बाटोमा अहिले विकासको नाममा असारे विकास भएको बताउँदै आएका छन् । उक्त बाटो हुँदै इटहरी २० की वडासदस्य कुमारी विकको घरसम्म जान सकिन्छ ।
तर, जनप्रतिनिधिकै घर अगाडि पनि अहिले विकासको नाममा गम्भीर लापरबाही भएकाले विकासको धज्जी उडेको स्थानीय बताउँछन् ।
स्थानीयले बाटो बिग्रिएपछि दमकल, एम्बुलेन्स र प्रहरीको गाडी समेत ओहोर दोहोर गर्न नसकिने स्थिति भएकोले समस्या रहेको बताउँदै आएपनि यसको सुनुवाई भएको छैन ।
यस बिषयमा इटहरी २० का वडाध्यक्ष मणिराम श्रेष्ठले भने तरहरा हुँदै मौलिहा, पटेरुवा, बक्लौरी जाने बाटोमा समस्या रहेको स्वीकार गरे ।
उनले भने, ‘स्थानीयले नाली सरसफाई नगरेका कारण ठूलो खाल्डो थियो, मैले व्यक्तिगत रुपमा खर्च गरेर माटो हालेको हो, तर अविरल बर्षाका कारण समस्या भयो ।’
उनले ठूलो खाल्डो भएकाले सम्याउने क्रममा माटो हालेको भएपनि अविरल बर्षाका कारण समस्या रहेको बताए । उनले टाकुरान्यूजसँग भने, ‘त्यो बाटो पिँच हुनका लागि ठेक्का लागिसकेको छ, त्यहाँ हालिएको माटो अन्य कुनै बजेटबिना नै मेरो पारिश्रमिकबाट बनाएको हो ।’
पानी रहने र मौसम सफा हुनेबित्तिकै तुरुन्तै व्यवस्थापनको काम हुने उनले बताए ।
‘अहिले खोला गिटी बन्द भएकाले समस्या छ,’ श्रेष्ठले भने, ‘नालीको पानी बाटोमा आएर खाल्डो भएको अवस्था छ ।’
उनका अनुसार उक्त बाटो पिँच गर्नका लागि सरोज बस्नेतले ठेक्का लिईसकेका छन् ।
हेर्नुहोस् भिडियो
Discussion about this post