इटहरी : तरहराका कोरोना संक्रमितको ट्राभल हिस्ट्री खुलेको छ ।
तरहरामा रहेको ग्रामीण उद्यम तथा बिप्रेषण आयोजना (समृद्धि) अफिसका दुईजना कर्मचारीमा कोरोना भाइरसको संक्रमण देखिएपछि उनीहरुसँग सम्पर्कमा आएका मानिसहरुको आवश्यक पहिचान गरिएको छ ।
दुई कर्मचारीमध्ये एकजनाले भने गाउँका दुईजना महिलासँग १९ गते सोमबार रक्षाबन्धन समेत बाँधेको खुलेको छ । ‘दुईजना बहिनीहरुसँग रक्षाबन्धन बाँधेको थिएँ,’ ती व्यक्तिले टाकुरासँग भने, ‘गाउँका अन्य दुईवटा पसलमा सामान किन्न पनि गएको थिएँ ।’
उनी कोरोना परीक्षण हुनुपूर्व विराटनगर र जनकपूर पनि गएका थिए । २० गते गरिएको परीक्षणमा उनको बिहीबार रिपोर्ट आएको थियो ।
ईलाम घर भएका उनी यहाँ सवारी चालकको रुपमा काम गर्दै आएका थिए । परीक्षण गर्नु अगाडि उनमा रुघा, मर्की लागेको, टाउको दुखेको, शरीर गलेको अनुभूत भएको उनले बताए ।
‘अहिले त श्वासप्रश्वासमा पनि समस्या छैन, पुरानै अवस्थामा छु,’ उनले भने, ‘नजिकैको दोकानमा गएको थिएँ, जनकपूरमा दुईदिन बसेको थिएँ ।’
उनले आँफू १३ गते जनकपुर गएको र त्यहाँको ‘जनकपुर पवन मिथिला होटल’ मा दुई दिन बसेको जानकारी दिए । उनीसँग जनकपूर गएका अर्का एकजनामा पनि कोरोना पुष्टि भएको र उनी अहिले होम आइसोलेशनमा रहेका छन् ।
अन्यको भने नेगेटिभ रिपोर्ट आएको छ ।
उनीसँग सम्पर्कमा आएका ९ जनाको पहिचान गरी शुक्रबार नै इटहरीको जनता बहुमुखी क्याम्पसमा स्वाब संकलन समेत गरिएको छ ।
उनीसँगै २० गते स्वाब दिईएका अन्य केही कर्मचारीको भने नेगेटिभ रिपोर्ट आएपनि सोमबार पुनः परीक्षण गर्ने तयारी गरिएको बुझिएको छ ।
Discussion about this post