इटहरी : माध्यमिक शिक्षा (एसइई) परीक्षामा ह्वाट्सएप ग्रुप बनाएर चोरी गरेको पाइएको छ ।
आइतबार गणित विषयको परीक्षामा ह्वाट्सएप ग्रुप बनाएर निरीक्षकले नै चिट चोराउँदै गर्दा सुनसरीका प्रमुख जिल्ला अधिकारी धर्मेन्द्र मिश्रसहितको अनुगमन टोलीले फेला पारेको हो ।
प्रजिअ मिश्रका अनुसार निरीक्षक तथा केन्द्राध्यक्षलाई परीक्षा सञ्चालन भएको कोठामा मोबाइल फोन लैजान रोक लगाइएको भए पनि ह्वाट्सएप ग्रुप बनाएरै चिट चोराइएको पाइएको हो ।
यसरी चिट चोराएको पाइएपछि सुनसरीको इनरुवास्थित भगवती माध्यमिक विद्यालयको परीक्षा केन्द्रबाट तीन जनालाई नियन्त्रणमा लिइएको छ ।
नियन्त्रणमा लिएका तीनै जना निरीक्षकले ह्वाट्सएप ग्रुप बनाएर भित्रको प्रश्नपत्र बाहिर पठाएर बाहिरबाट सबै प्रश्नको उत्तर लेखेर पठाउने र विद्यार्थीलाई सिकाउने गरेको पाइएको हो ।
यसैगरी अनधिकृत गतिविधि गर्ने इनरुवाकै बबिया माध्यमिक विद्यालयको परीक्षा केन्द्रबाट दुई जना निरीक्षकलाई निष्कासन गरेको छ ।
भगवती माध्यमिक विद्यालयको परीक्षा केन्द्रबाट इनरुवा वडा नं. ४ स्थायी घर भई कोशी गाउँपालिका वडा नं. १ को राष्ट्रिय माध्यमिक विद्यालयमा कार्यरत ३६ वर्षे मुकेन्द्र यादव, इनरुवा वडा नं. ५ का भगवती विद्यालयमै कार्यरत ५४ वर्षे रमानन्द यादव र इनरुवा वडा नं. ४ घर भएका वीपी आधारभूत विद्यालय इनरुवामा कार्यरत ४४ वर्षे दिनेशप्रसाद यादवलाई नियन्त्रणमा लिइएको सुनसरी प्रहरीका एसपी सुमन तिम्सिनाले जानकारी दिए ।
उनीहरूमाथि थप अनुसन्धान भइरहेको तिम्सिनाले बताए । उनका अनुसार आइतबार बिहान प्रजिअको नेतृत्वमा प्रहरी अधिकारीहरूले अनुगमन गरेका थिए ।
यसअघि गत बिहीबार मात्रै सुनसरीकै दुहबीको सरस्वती माध्यमिक विद्यालय र गढीको सरस्वती माध्यमिक विद्यालयबाट दुई÷दुई जना निरीक्षकलाई निष्कासन गरिएको थियो ।
सुनसरीका प्रमुख जिल्ला अधिकारी मिश्र नेतृत्व टोलीले अनधिकृत गतिविधि गरेको र विषय शिक्षक राखेको भेटिएपछि निष्कासन गरिएको थियो । दुवै परीक्षा केन्द्रका केन्द्राध्यक्षलाई आगामी दिनमा त्रुटि नगर्न सचेतसमेत गरिएको प्रजिअ मिश्रले बताए ।
उनका अनुसार परीक्षालाई व्यवस्थित, मर्यादित, शान्त र भयरहित बनाउन सबै परीक्षा केन्द्रका केन्द्राध्यक्षलाई आवश्यक सकुर्लर गरिएको छ ।
सुनसरीमा खासगरी निजी विद्यालयका सञ्चालकको आर्थिक प्रलोभनमा निरीक्षक फस्ने गरेको प्रारम्भिक अनुसन्धानबाट खुलेको बताइन्छ । जिल्लाका ५० परीक्षा केन्द्रमा १३ हजार ५७३ परीक्षार्थी सहभागी भएका छन् ।
यो पनि – एसईई : सुनसरीका परीक्षा केन्द्रबाट चार जना निरीक्षक निष्कासन
भिडिओ
Discussion about this post