ताप्लेजुङ : कोशी प्रदेश प्रहरी प्रमुख, प्रहरी नायव महानिरीक्षक (डीआईजी) ईश्वर कार्कीले मंगलबार जिल्ला प्रहरी कार्यालय ताप्लेजुङको निरीक्षण भ्रमण गरेका छन्।
भ्रमणको क्रममा उनले कार्यालय भवन, विभिन्न शाखा र हिरासत कक्षको निरीक्षण गर्नुका साथै कार्यरत प्रहरी कर्मचारीलाई निर्देशन दिएका हुन्।
निरीक्षणका क्रममा डीआईजी कार्कीले प्रहरीको आचरण, व्यवहार र सेवा प्रवाहमा सुधार ल्याउन आवश्यक रहेको बताउँदै, आफ्नो जिम्मेवारीलाई नागरिकमैत्री ढंगले निर्वाह गर्न निर्देशन दिए । उनले आपसी भाइचारा, सहयोगी भावना, र संगठनप्रतिको निष्ठा राख्दै प्रहरीले नागरिकलाई सहज र सम्मानजनक सेवा दिनुपर्ने कुरामा जोड दिए।
उनले कोशी प्रदेश पर्यटन वर्ष २०८२ को अवसरमा ताप्लेजुङको धार्मिक तथा पर्यटकीय क्षेत्रहरूमा भ्रमण गर्न आउने पर्यटकहरूको सुरक्षाका लागि उच्च सतर्कता अपनाउन निर्देशन दिए। साथै, पर्यटनमैत्री व्यवहार र गुणस्तरीय प्रहरी सेवा प्रदान गर्न पनि आग्रह गरे।
डीआईजी कार्कीले शान्ति सुरक्षा, अपराध नियन्त्रण, अनुसन्धान र जनचेतनामूलक कार्यक्रमहरू प्रभावकारी रूपमा सञ्चालन गर्न निर्देशन दिए। वर्षायाममा सम्भावित बाढी, पहिरो र अन्य विपद्को जोखिमलाई ध्यानमा राखी तत्काल उद्धारका लागि तयारी अवस्थामा रहनुपर्ने कुरामा पनि उनले जोड दिए।
निरीक्षण भ्रमणका क्रममा प्रहरी वरिष्ठ हवल्दार सन्तोष कुमार तामाङलाई पुरस्कृत समेत गरिएको छ।
तामाङले जेठ ११ गते फक्तालुङ गाउँपालिका–३ मा खुकुरी प्रहार गरी हत्या गरेर फरार रहेका अर्जुन गुरुङलाई खुकुरीसहित पक्राउ गर्न सफल भएका थिए।
ताप्लेजुङको फक्तालुङ गाउँपालिका ३ का २८ वर्षीय टेकेन्द्र लिम्बुलाई खुकुरी प्रहार गरी फुङलिङ नगरपालिका ६ का ३० वर्षीय गुरुङले हत्या गरेका थिए।
सो घटनामा संलग्नलाई पक्राउ गर्न सफल भएकाले उक्त कार्यको उच्च मूल्यांकन गर्दै प्रहरी प्रमुख कार्कीले सम्मानसहित पुरस्कार प्रदान गरेका हुन्।
Discussion about this post