विराटनगर : कोशी प्रदेश प्रहरीले आर्थिक वर्ष २०८१।८२ मा फरार रहेका तीन हजार पाँच सय १३ जना फरार प्रतिवादीलाई पक्राउ गरेको छ।
प्रदेश प्रहरी कार्यालय विराटनगरका अनुसार अदालतबाट दोषी ठहर भई कैद तथा जरिवाना तोकिएका तर फरार रहेका व्यक्तिहरूलाई कानूनी दायरामा ल्याउन विशेष रणनीति, सूचना प्रविधिको प्रयोग र समुदायसँगको सहकार्यमार्फत अभियान सञ्चालन गरिएको थियो।
यस अभियानअन्तर्गत मोरङबाट सबैभन्दा बढी एक हजार १५६ जना, सुनसरीबाट एक हजार २ जना, झापाबाट पाँच सय ३४ जना, इलामबाट एक सय ४६ जना, पाँचथरबाट ४२ जना, ताप्लेजुङबाट ४८ जना, धनकुटाबाट ५७ जना, तेह्रथुमबाट ४५ जना, भोजपुरबाट ४४ जना, संखुवासभाबाट २८ जना, उदयपुरबाट २६० जना, ओखलढुंगाबाट ६९ जना, सोलुखुम्बुबाट १४ जना, खोटाङबाट ५३ जना र प्रादेशिक अनुसन्धान समूहबाट १५ जना पक्राउ परेका हुन्।
पक्राउ परेका प्रतिवादीहरूबाट जम्मा एक हजार चार सय १६ वर्षभन्दा बढीको कैद सजाय कार्यान्वयनमा आएको छ भने जरिवाना बापत १४ करोड ७७ लाख रुपैयाँभन्दा बढी राजस्व संकलन गरिएको कोशी प्रदेश प्रहरीले जनाएको छ।
प्रहरीका अनुसार, फरार प्रतिवादी समाजमै खुलेआम बस्दा शान्ति सुरक्षामा चुनौती आउने, अपराध दोहोरिने सम्भावना बढ्ने र समाजमा नकारात्मक सन्देश जाने हुँदा उनीहरूलाई कानूनी दायरामा ल्याउनु अपरिहार्य थियो।
प्रहरीले गाउँ–घर, छिमेकमा लुकेर बसेका यस्ता व्यक्तिहरूको सूचना नजिकको प्रहरी कार्यालयमा दिन नागरिकहरूलाई अनुरोध गरेको छ। सूचना दिने व्यक्तिको गोपनीयता पूर्ण रूपमा सुरक्षित राखिने र आवश्यक सुरक्षा प्रदान गरिने पनि प्रहरीले जनाएको छ।
खासगरी अपराध गर्ने छुट कसैलाई छैन, अपराध गरी लुकेर, भागेर धर पाइदैँन, ढिलो होस् या चाँडो, जसरी जहिले भएपनि प्रहरीले अपराध गर्ने व्यक्तिलाई पक्राउ गरेरै छाड्छ भन्ने विश्वास कोशी प्रदेश प्रहरीले आम नागरिकहरूलाई दिलाउँदै आएको प्रहरीको भनाइ छ।
Discussion about this post