इटहरी : कोशी प्रदेशमा ट्राफिक व्यवस्थापन र सवारी दुर्घटना न्यूनीकरणका लागि ट्राफिक प्रहरीले सशक्त र योजनाबद्ध पहल गर्दै आएको जनाएको छ।
आर्थिक वर्ष २०८१।०८२ मा ट्राफिक प्रहरीले ६ लाख १६ हजारभन्दा बढी सडक प्रयोगकर्तालाई सचेतनामूलक कार्यक्रममार्फत जानकारी प्रदान गरेको छ । यसैगरी ट्राफिक नियम उल्लंघन गर्ने २ लाख १३ हजार ६९५ सवारीसाधनलाई कारबाही गरी १६ करोड २९ लाख ७१ हजार ५५१ रुपैयाँ राजस्व संकलन गरेको छ।
नेपाल प्रहरी अन्तर्गत राजमार्ग सुरक्षा तथा ट्राफिक व्यवस्थापन कार्यालय इटहरीका अनुसार कोशी प्रदेशका १४ जिल्लामा रहेका जिल्ला ट्राफिक कार्यालयसहित ९६ वटा ट्राफिक इकाईमार्फत दैनिक रूपमा ट्राफिक कार्यहरू सम्पादन भइरहेका छन्।
सडक दुर्घटना न्यूनीकरणका लागि ट्राफिक प्रहरीले २६ हजार २९३ पटक सचेतनामूलक कार्यक्रम सञ्चालन गरेको हो, जसबाट चालक, सहचालक, विद्यार्थी र सर्वसाधारण लाभान्वित भएका छन्।
ट्राफिक व्यवस्थापन प्रविधिमैत्री बनाउन प्रदेशभर ९३२ स्थानमा सीसीटीभी क्यामेरा जडान गरिएको छ। झापाको झिलझिले, विराटनगरको दूधफारम र खार्जीमा नम्बर प्लेट डिटेक्टरयुक्त क्यामेरा समेत जडान गरिएको छ।
भारतबाट आउने तथा लामो दुरीका सवारीसाधन जाँचका लागि ६ स्थानमा ट्राफिक कम्युनिकेशन एप प्रयोग भइरहेको छ। साथै, सार्वजनिक सवारीको गति नियन्त्रणका लागि २१ स्थानमा टाइम कार्ड प्रणाली लागू गरिएको छ।
सवारी कारबाही पारदर्शी बनाउन ट्राफिक भायोलेसन रेकर्ड सिस्टम कार्यान्वयनमा ल्याइएको जनाइएको छ।
लागूऔषध सेवन र मादक पदार्थ सेवन गरेर सवारी चलाउनेलाई रोक्न ‘लापसे’ तथा ‘मापसे’ जाँच कडाइका साथ गरिएको छ भने राडरगनमार्फत तीव्र गतिमा चलाइएका सवारीको निगरानी भइरहेको प्रहरीको भनाइ छ।
चालकको लापरवाहीका कारण दुर्घटना
सवारी दुर्घटनाका प्रमुख कारणहरूमा तीव्र गतिको सवारी, मोबाइल फोनको प्रयोग, सिट क्षमताभन्दा बढी यात्रु राख्ने, अधिक भार तान्ने, हेल्मेटको फिता नबाँध्ने, सिट बेल्ट नलगाउने, मादक पदार्थ सेवन, थकित अवस्था, अनुमतिपत्रविना सवारी सञ्चालन लगायतका लापरवाहीहरू रहेका छन्।
सोही कारण आर्थिक वर्ष २०८१।०८२ मा प्रदेशभर दुर्घटनामा ४१८ जनाको ज्यान गएको प्रहरीको तथ्यांकमा उल्लेख छ । जसमा ७११ जना गम्भीर घाइते भएका छन् भने ८ हजार ५३० जना सामान्य घाइते भएका छन्।
‘म जिम्मेवार चालक, हामी जिम्मेवार यात्रु’
ट्राफिक प्रहरीले यो प्रयासमा एक्लो नभई चालक, यात्रु र सडक प्रयोगकर्ता सबैको सक्रिय सहभागिता अपरिहार्य रहेको स्पष्ट पारेको छ। ट्राफिक नियम पालना गर्दा मात्र दुर्घटनाको जोखिम कम गर्न सकिने बताउँदै “ट्राफिक नियम आफ्नै सुरक्षाका लागि हो” भन्ने सन्देश दिइएको छ।
सन्देशमा भनिएको छ – ‘म’ जिम्मेवार चालक, ‘हामी’ जिम्मेवार यात्रु, सुरक्षित सडक र सवारी, हामी सबैको जिम्मेवारी।
Discussion about this post