कोशी प्रदेश प्रहरी प्रमुख कार्कीको धनकुटामा निरीक्षण, स्थानीयसँग अन्तरक्रिया

धनकुटा : कोशी प्रदेश प्रहरी प्रमुख प्रहरी नायव महानिरीक्षक (डीआईजी) ईश्वर कार्कीले जिल्ला प्रहरी कार्यालय धनकुटाको निरीक्षण भ्रमण गर्दै प्रहरी सेवामा प्रविधि प्रयोग र नागरिकमैत्री कार्यशैली अंगिकार गर्न निर्देशन दिएका छन्।

निरीक्षणका क्रममा कार्यालय भवन, शाखाहरू र हिरासत कक्षको अवस्थाबारे अवलोकन गर्दै उनले प्रहरी कर्मचारीलाई वर्तमान समयअनुरूप प्रविधिको प्रयोगमार्फत शान्ति–सुरक्षा कायम गर्न, सार्वजनिक सम्पत्तिको रक्षा गर्न र सचेतनामूलक कार्यक्रममार्फत अपराधलाई निरुत्साहित गर्न निर्देशन दिए।

सीमित स्रोत साधनका बाबजुद धनकुटामा शान्ति–सुरक्षा मजबुत बनाएको भन्दै प्रहरी कर्मचारीलाई धन्यवाद दिँदै उनले संगठनको छवि उच्च राख्न इमान्दारीपूर्वक काम गर्न आग्रह गरे।

सो क्रममा जिल्ला प्रहरी कार्यालय धनकुटाका प्रमुख प्रहरी उपरीक्षक शरत थापा क्षेत्रीले जिल्लाको शान्ति–सुरक्षा अवस्था, प्रहरी परिचालन, विपद् उद्धार तथा चुनौतीबारे जानकारी दिए।

सोही क्रममा डीआईजी कार्कीले जिल्ला समन्वय समिति धनकुटाकी उप–प्रमुख सावित्रा राई, स्थानीय जनप्रतिनिधि, विभिन्न संघ–संस्था, नागरिक समाज, सञ्चारकर्मी तथा विद्यार्थीहरूसँग छलफल तथा अन्तरक्रिया गरे।

उनले शान्तिपूर्ण समाज निर्माणमा प्रहरी मात्र नभई नागरिकको साथ र सहयोग अपरिहार्य हुने भन्दै हातेमालो गर्दै अघि बढ्नुपर्नेमा जोड दिए।