पाँचथर : पाँचथरको फाल्गुनन्द–२ निवासी चक्रराज रम्तेलबाट २० लाख रुपियाँ ठगी गरेको अभियोगमा प्रहरीले एक जनालाई पक्राउ गरेको छ।
पक्राउ पर्नेमा मोरङको रङ्गेली नगरपालिका–४ घर भई हाल चितवनको भरतपुर महानगरपालिका–४ त्रिचोकमा बसोबास गर्दै आएका अमित महतो भन्ने कृष्ण मुर्मु रहेका छन्।
जिल्ला प्रहरी कार्यालय पाँचथरका अनुसार मुर्मुले नवलपरासीका जोगबहादुर थारु र बच्चु गुरुङसँग मिलेमतो गरी साझेदारीमा जग्गा कारोबार, डलर कारोबार र विभिन्न व्यापार व्यवसाय गर्ने प्रलोभन देखाएर रम्तेलबाट २० लाख रुपियाँ ठगी गरेका थिए।
प्रहरीका अनुसार मुर्मुलाई चितवन प्रहरीसँगको सहकार्यमा पक्राउ गरी पाँचथर ल्याइएको हो। अन्य आरोपीहरूको खोजी कार्य जारी रहेको र मुर्मुलाई अदालतमा पेश गर्ने तयारी भइरहेको प्रहरीले जनाएको छ।
हाल उनलाई जिल्ला प्रहरी कार्यालय पाँचथरको हिरासतमा राखी थप अनुसन्धान भइरहेको प्रहरीले जनाएको छ।
Discussion about this post