विराटनगर : सामाजिक सञ्जाल बन्द र भ्रष्टाचारविरुद्ध भएको प्रदर्शनपछि लगाइएको निषेधाज्ञा र कर्फ्यूका बीच पनि विराट मेडिकल कलेज टिचिङ अस्पतालका स्वास्थ्यकर्मीले बिरामीको उपचारमा कुनै अवरोध हुन नदिन निरन्तर सेवा दिइरहेका छन्।
तर नर्सहरूले अस्पताल आउजाउ गर्दा भने समस्याको सामना गर्नुपरेको छ। परिचयपत्र र पोशाक देखाउँदा समेत बाटोमा सुरक्षाकर्मीले रोकेको गुनासो उनीहरूको छ।
मोरङको बूढीगंगा गाउँपालिका–२ स्थित अस्पतालमा धरान, इटहरी, सुन्दरहरैंचा, विराटनगर, झोराहाट र बर्जु लगायत स्थानबाट आउने नर्सहरूलाई आवतजावतमा कठिनाइ भएको अस्पताल प्रशासनले जनाएको छ।
अस्पतालको आईसीयू लेभल–३ की नर्सिङ इन्चार्ज माधुरी राईले भनिन्, “हिजो मात्रै एक स्वास्थ्यकर्मीलाई अस्पतालको पोशाक र परिचयपत्र देखाउँदा समेत बाटोबाट फर्काइयो।”
यस्तै, नर्सिङ स्टाफ रिया खड्काले तरहराबाट काममा आउन दैनिक समस्या भोग्नुपरेको बताउँदै भनिन्, “हरेक दिन यातायातमा आउनुपर्ने अवस्था थियो । अहिले अप्ठ्यारो भएको छ ।”
विराट मेडिकलमा कार्यरत ५२० नर्समध्ये धेरैजना टाढाबाट आउने गर्छन्। नर्सिङ सुपरिन्टेन्डेन्ट आयुष्मा शाक्यका अनुसार बिरामीको चाप बढिरहेको छ भने उपलब्ध नर्सको संख्या कम भएकाले व्यवस्थापनमा कठिनाइ भए पनि सेवामा निरन्तर खटिएको छ।
“एक जना पनि स्वास्थ्यकर्मी कम भएमा बिरामीको सेवामा असर पर्छ,” राईले भनिन्। उनले अस्पतालले टाढाबाट आउने कर्मचारी र स्वास्थ्यकर्मीका लागि बस सुविधा उपलब्ध गराएको र यसले केही सहजता ल्याएको पनि प्रष्ट पारिन्।
उनले थपिन्, “मनमा डर भए पनि आफ्नो काम र कर्तव्य निभाउन पाउँदा खुशी लाग्छ। हामी जस्तोसुकै परिस्थितिका लागि पनि सधैं तयारी अवस्थामा हुन्छौं।” उनले कोरोना महामारीमा स्वास्थ्यकर्मीले देखाएको प्रतिबद्धताको उदाहरण दिँदै अहिले पनि बिरामी सेवामा समान उत्साह देखिएको बताइन्।
यसैबीच, जिल्ला प्रशासन कार्यालय मोरङले जिल्लामा शान्ति सुरक्षाको स्थिति सामान्य बन्दै गएको भन्दै लगाइएको निषेधाज्ञा र कर्फ्यू आदेश रद्द गरेको जनाएको छ।
Discussion about this post