इटहरी : झापाको काँकडभिट्टादेखि इटहरीको लबीपुरसम्म निर्माणाधीन रहेको एसिएन हाइवे अन्तर्गत इटहरीमा हालसम्म २५ वटा संरचना हटाइएको छ ।
इटहरी खण्डमा पर्ने सडक क्षेत्र विस्तारका क्रममा एक सय २४ वटा संरचनामध्ये हालसम्म २५ वटा संरचना हटाइएको हो।
काँकडभिट्टा–लौकही सडक आयोजना पश्चिम खण्ड इटहरी कार्यालयका सूचना अधिकारी इन्जिनियर पल्लव श्रेष्ठकाअनुसार बाँकी संरचना हटाउने चरणमा छ ।
इटहरी बूढीखोलादेखि लबीपुरसम्म देवीखोला सडक खण्डमा पर्ने संरचना सरकारी नक्साअनुसार सडक सीमाभित्र परेकाले मुआब्जा तथा क्षतिपूर्तिसहित हटाइराखिएको उनले बताए ।
‘इटहरी बजार क्षेत्रमा एक सय २४ वटा संरचना भत्काउनुपर्ने अवस्थामा २५ वटा संरचना हटाइएको छ। अन्य पनि भत्काइराखेको अवस्था छ,’ श्रेष्ठले भने, ‘समयमै संरचना हटाएर सहयोग गरेमा काम छिटो हुन्छ।’
पूर्वी खण्डमा ४५ किलोमिटर र पश्चिम खण्डमा ५०.७ किलोमिटर सडकको काम भइरहेको उनले बताए ।
पश्चिम खण्डमा पर्ने इटहरी क्षेत्रमा धमाधम संरचना हटाइएपनि कतिपय संरचना हालसम्म हटाउने तयारीसमेत छैन ।
तिहारपछि बाँकी संरचना भत्किने आयोजनाले जनाएको छ ।
प्याकेज एक र चार पूर्वी खण्डले हेर्दै आएको छ भने प्याकेज दुई, तीन र पाँच पश्चिम खण्डले हेर्दै आएको छ ।
जसअनुसार प्याकेज दुईमा झापाको सीतापुरीदेखि मोरङको गोठगाउँसम्म पर्छ भने प्याकेज तीन गोठगाउँदेखि इटहरीको लबीपुरसम्म पर्छ। प्याकेज पाँच भने तीन सय मिटरभन्दा लामो पुल पर्ने उनले बताए ।
प्याकेज २, ३ र ५ पश्चिम खण्ड इटहरी कार्यालयले हेर्दै आएको छ। यसैगरी प्याकेज १ र ४ पूर्वी खण्ड दमकले हेर्दै आएको छ ।
एसियाली विकास बैंकको ऋण सहयोग र नेपाल सरकारसँगको साझेदारीमा उक्त सडक निर्माण भएको हो ।
जसमा एसियाली विकास बैंकले ८४.१ प्रतिशत ऋण सहयोग गरेको छ भने १५.९ प्रतिशत रकम भने नेपाल सरकारको रहेको छ । कुल ३४ अर्ब ९१ करोड रुपैयाँ बजेटमा काँकडभिट्टादेखि लौकहीसम्म सडक बन्नेगरी सम्झौता भएको हो ।
यो आयोजना एसियन हाइवेको एउटा भाग हो । २०२४ फेब्रुअरी १ बाट सुरु भएको योजना २०२७ फेब्रुअरी १ मा सम्पन्न गर्ने लक्ष्य छ ।
भिडिओ
Discussion about this post