विराटनगर : कोशी प्रदेश प्रहरी प्रमुख प्रहरी नायव महानिरीक्षक (डीआईजी) ईश्वर कार्कीले दिपावली, छठ, उधौली लगायतका चाडपर्वलाई हर्षोल्लासका साथ मर्यादित, सुरक्षित र भयरहित वातावरणमा मनाउन सबै जिल्ला प्रहरी प्रमुख तथा इलाका प्रहरी कार्यालयका प्रमुखहरूलाई निर्देशन दिएका छन् ।
आइतवार भर्चुअल माध्यममार्फत आयोजित बैठकमा डीआईजी कार्कीले चाडपर्व विशेष सुरक्षा योजना अनुसार प्रहरी परिचालन गर्न निर्देशन दिएका हुन् ।
पर्वको समयमा हुनसक्ने अवाञ्छित गतिविधि, कालोबजारी, खुला सिमानाका कारण हुने चोरी–तस्करी, लागूऔषधको ओसारपसार तथा प्रयोग, झैझगडा र जुवा–तासजन्य गतिविधि नियन्त्रण गर्न कडाइका साथ निगरानी बढाउन निर्देशन दिए ।
यस्तै, मेला–पर्व, बैङ्क तथा वित्तीय संस्था, सुनचाँदी पसललगायतका संवेदनशील स्थानहरूमा प्रहरीको निगरानी सुदृढ बनाउन र सम्बन्धित निकायसँगको समन्वयमा प्रभावकारी बजार अनुगमन गर्न उनले निर्देशन दिए ।
यात्रुहरूको आवागमन सहज बनाउन र सडक दुर्घटना हुन नदिन ट्राफिक व्यवस्थापनमा विशेष ध्यान दिन समेत उनले आग्रह गरे ।
डीआईजी कार्कीले मौसम प्रतिकूलताका कारण विपद्का घटनाहरू भइरहेकाले प्रहरी संवेदनशील भई अन्य सुरक्षा निकायहरूसँग समन्वयमा परिचालन हुनुपर्ने आवश्यकता औंल्याए ।
Discussion about this post