इटहरी : कोशी प्रदेश प्रहरी कार्यालय विराटनगरमा नयाँ प्रहरी प्रमुखका रूपमा आएका प्रहरी नायव महानिरीक्षक (डीआईजी) विनोद घिमिरेले पदभार ग्रहण गरेका छन् ।
पदभार ग्रहणका क्रममा प्रदेश प्रहरी तालिम केन्द्रका समादेशक प्रहरी वरिष्ठ उपरीक्षक (एसएसपी) गोविन्द अधिकारी, प्रदेश प्रहरी कार्यालय विराटनगरका एसएसपी दीपक पोखरेल, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरी, कोशी प्रदेश प्रहरी गण रानी, जिल्ला प्रहरी कार्यालय सुनसरीका प्रमुख लगायतका अधिकृतले डीआईजी घिमिरेलाई स्वागत गरेका थिए।
कार्यभार सम्हालेलगत्तै कार्यालयमा आयोजित कार्यक्रममा घिमिरेले उपस्थित प्रहरी अधिकृत, कर्मचारी तथा भर्चुअल रूपमा सहभागी जिल्ला प्रहरी प्रमुखहरूलाई निर्देशन दिँदै कठिनतम परिस्थितिमा पनि अग्रपंक्तिमा रहेर उच्च मनोबलका साथ अपराध नियन्त्रण र शान्ति-सुरक्षा कायम राख्न निर्देशन दिए।
७० वर्षको इतिहास बोकेको प्रहरी संगठनले आरोह–अवरोहका बीच पनि कानून कार्यान्वयनमार्फत राष्ट्र र जनताको सेवा गर्दै आएको उल्लेख गर्दै उनले राज्यको उपस्थिति नै प्रहरी रहेकाले प्रहरीविहीन समाज अकल्पनीय हुने बताए ।
समय र परिवर्तित परिस्थितिअनुसार आत्मसुधार, भातृत्व, सहकार्य, समन्वय र प्रविधिको प्रभावकारी प्रयोग गर्दै संगठनको गरिमा उच्च राख्न सबैलाई निर्देशितसमेत गरे ।
साथै, डीआईजी घिमिरेले राम्रो काम गर्ने प्रहरीलाई तत्काल पुरस्कृत गर्ने तथा कानून विपरीत कार्य गर्नेप्रति तत्काल कारबाही गर्ने व्यवस्था कडाइका साथ लागू गर्नेसमेत बताए ।
Discussion about this post