इटहरी : सुप्रसिद्ध कवि जसराज किरातीलाई नेपाली प्रतिभा प्रतिष्ठान, बेलायतद्वारा आयोजना गरिएको ‘प्रतिभा विशेष सम्मान’ प्रदान गरिएको छ ।
नेपाल प्रज्ञा–प्रतिष्ठानका पूर्वकुलपति तथा विशिष्ट कवि बैरागी काईँलाको प्रमुख आतिथ्यतामा सम्पन्न कार्यक्रममा किरातीलाई एक लाख रुपैयाँ, दोसल्ला तथा सम्मानपत्रले सम्मान गरिएको हो । बहुआयामिक व्यक्तित्वका धनी किराती खोटाङ निवासी हुन् ।
कविता लेखनमा ६ दशकभन्दा बढी सयम गुजारेका उनी अहिले पनि लेखन क्षेत्रमा सक्रिय छन् । २०३४ सालमा उनको पहिलो कवितासंग्रह ‘उज्यालो खोज्ने आँखाहरू’ प्रकाशित भयो।
२०५७ मा दोस्रो कवितासंग्रह ‘जसराज किरातीका कविता’ प्रकाशन भयो। २०६५ मा उनको तेस्रो कवितासंग्रह ‘जसराज किरातीका प्रतिनिधि कविता’ प्रकाशित भएको छ ।
‘कविता लेख्नु भनेको नक्कल गर्नु होइन’ भन्ने विचार राख्ने किराती कलासाहित्यसँग सम्बन्धित कार्यक्रममा बोलाएको ठाउँमा सकेसम्म पुग्छन् । माइक समाउनासाथ जसराज भन्छन्, ‘म अलिअलि कविता लेख्ने मान्छे हुँ। म आफ्नै कविता पनि भन्न बिर्सिन थालेँ। स्मरणशक्ति घट्यो।’
सोमवार आयोजना भएको उक्त कार्यक्रममा किरातीले साहित्यिक योगदान, सिर्जनात्मक सक्रियता र नेपाली कवितामा पुर्याएको दीर्घ योगदानका आधारमा ‘प्रतिभा विशेष सम्मान’ गरिएको आयोजकले जनाएको छ ।
यस्तै, युवा साहित्यकार विजेता चौधरीलाई ‘प्रतिभा पुरस्कार’ प्रदान गरिएको छ। युवा पुस्तामा देखिएको सिर्जनात्मक ऊर्जा तथा साहित्यिक सम्भावनालाई कदर गर्दै चौधरीलाई सम्मानपत्र र एक लाखसहित दोसल्ला प्रदान गरिएको छ।
प्रमुख अतिथि काईँलाले यस्ता कार्यक्रमहरूले स्रष्टाहरूलाई थप सिर्जनात्मक ऊर्जा र उत्साह दिन मद्दत गर्ने उल्लेख गर्दै निरन्तरता दिनुपर्नेमा जोड दिए।
नेपाली प्रतिभा प्रतिष्ठान, बेलायतका उपाध्यक्ष कवि मिजास तेम्बे, प्रसिद्ध कवि प्राज्ञ श्रवण मुकारुङ, समालोचक तथा साहित्यकार डा. तुलसी गौतम लगायत अन्य विशिष्ट व्यक्तित्वहरूको उपस्थिति उल्लेखनीय रह्यो।
कार्यक्रमको संचालन कवि प्राज्ञ सशी लुमुम्बुले गरेका थिए।
नेपाली प्रतिभा प्रतिष्ठान, बेलायतले हरेक वर्ष साहित्य, कला तथा सिर्जनशील क्षेत्रमा निरन्तर योगदान पुर्याउने व्यक्तिहरूलाई सम्मान गर्दै आएको छ।
Discussion about this post