इटहरी : प्रतिनिधिसभा सदस्य निर्वाचनलाई भयरहित, निष्पक्ष र शान्तिपूर्ण वातावरणमा सम्पन्न गराउने लक्ष्यसहित सुनसरीमा सुरक्षा व्यवस्था उच्च सतर्कताका साथ कडाइ गरिएको छ।
जिल्ला प्रहरी कार्यालय सुनसरीका प्रमुख एसपी केशवकुमार थेबेका अनुसार जिल्लामा डीएसपीसहित थप ४५० जना प्रहरी परिचालन गरिएको छ।
संयुक्त सुरक्षा संयन्त्रमार्फत निरन्तर निगरानी तथा गस्ती सञ्चालन भइरहेको उनले बताए।
जिल्लाका चारवटै निर्वाचन क्षेत्रअन्तर्गत रहेका कुल १६७ मतदानस्थलमध्ये ५९ स्थल ‘अति संवेदनशील’ र ६६ स्थल ‘संवेदनशील’ घोषणा गरिएको छ। ती क्षेत्रमा विशेष सुरक्षा रणनीति लागू गरिएको प्रहरीले जनाएको छ।
प्रतिनिधिसभा निर्वाचन सुरक्षाका लागि १ हजार ५ सयभन्दा बढी नेपाल प्रहरी र ३ हजार १ सय ४९ जना निर्वाचन प्रहरी खटाइने भएका छन्।
संवेदनशील तथा अति संवेदनशील केन्द्रमा मोबाइल गस्ती टोली, सशस्त्र प्रहरी बल नेपाल तथा तेस्रो घेरामा नेपाली सेना समेत परिचालन हुने व्यवस्था मिलाइएको छ।
मतदान केन्द्र वरपर सादा पोशाकका प्रहरी तैनाथ गरिएका छन् भने शंकास्पद गतिविधिमाथि निगरानी गर्न विशेष टोली सक्रिय बनाइएको छ।
सीमा क्षेत्रअन्तर्गत बर्जु, देवानगञ्ज, हरिनगर र कोशी गाउँपालिकाका मतदानस्थलमा नेपाल प्रहरी, सशस्त्र प्रहरी बल र राष्ट्रिय अनुसन्धान विभागको संयुक्त टोलीले स्थलगत अनुगमन गरिसकेको छ।
सम्भावित अवाञ्छित गतिविधि नियन्त्रणका लागि जिल्लाभर द्रुत प्रतिक्रिया टोली (र्यापिड टिम) तयारी अवस्थामा राखिएको छ।
यसैबीच, सुनसरी कारागारमा रहेका १४९ जना कैदीबन्दीले समानुपातिकतर्फ मतदान गर्ने व्यवस्था मिलाइएको छ। कारागार क्षेत्रको सुरक्षालाई समेत उच्च प्राथमिकतामा राखिएको प्रहरीले जनाएको छ।
निर्वाचन आचारसंहिता उल्लंघन, भ्रामक सूचना प्रवाह तथा अनावश्यक भीडभाड नियन्त्रणका लागि निगरानी थप कडा पारिएको छ।
Discussion about this post