इटहरी : तेह्रथुम र पाँचथरमा भएका छुट्टाछुट्टै सवारी दुर्घटनामा दुई जनाको मृत्यु भएको छ।
तेह्रथुमको म्याङलुङ नगरपालिका–९ बगाले होटल अगाडि मध्यपहाडी लोकमार्गमा बोलेरो दुर्घटना हुँदा एक जनाको मृत्यु भएको छ।
जिरीखिम्तीबाट म्याङलुङतर्फ जाँदै गरेको प्र.१–०२–००२ च ५६०४ नम्बरको बोलेरोको अचानक ब्रेक फेल भई नालीको भित्तामा ठोक्किएर दुर्घटना भएको प्रहरीले जनाएको छ।
दुर्घटनामा बोलेरोमा सवार तेह्रथुमको फेदाप गाउँपालिका–४ जलजलेका करिब ४० वर्षीय टेकबहादुर कटेल घाइते भएका थिए। उनको टाउको र अनुहारमा चोट लागेको थियो।
उपचारका लागि जिल्ला अस्पताल तेह्रथुम पुर्याइएका कटेललाई अस्पतालका चिकित्सकले बुधबार दिउँसो १२ः२० बजे मृत घोषणा गरेका थिए।
बोलेरोका चालक पाँचथरको मिक्लाजुङ गाउँपालिका–८ का करिब ४३ वर्षीय राजेन्द्र श्रेष्ठ भने सामान्य अवस्थामा रहेको प्रहरीले जनाएको छ। उनलाई जिल्ला प्रहरी कार्यालय तेह्रथुमले नियन्त्रणमा लिएको छ।
यसैगरी, पाँचथरको फिदिम नगरपालिका–८ मान्द्रेभीरमा अटो दुर्घटना हुँदा चालकको मृत्यु भएको छ। पौवाभञ्ज्याङबाट रानिटारतर्फ जाँदै गरेको प्र.१–०१–०२ स ६००७ नम्बरको टीभीएस कम्पनीको अटो आफैँ अनियन्त्रित भई सडकबाट करिब ७०० मिटर तल खसेर दुर्घटना भएको हो।
दुर्घटनामा फिदिम नगरपालिका–८ का करिब ४२ वर्षीय अटो चालक सुजन राई घटनास्थलमै मृत अवस्थामा फेला परेको प्रहरीले जनाएको छ। दुर्घटनापछि अटोमा आगलागीसमेत भएको थियो।
उक्त अटोमा चालकसहित अन्य व्यक्ति सवार थिए वा थिएनन् भन्ने खुलेको छैन। अटो घटनास्थलमै रहेको प्रहरीले जनाएको छ।
पाँचथरको उक्त सडक पौवाभञ्ज्याङबाट तमाखे–रानिटार जाने भित्री कच्ची सडक खण्ड हो।
उकालो तथा भिरालो कच्ची सडकका कारण अटो अनियन्त्रित भएर दुर्घटना भएको प्रारम्भिक अनुमान गरिएको छ। घटनास्थल ट्राफिक प्रहरी पोष्ट राकेबाट करिब १३ किलोमिटर पूर्वमा पर्छ।
दुवै दुर्घटनाबारे प्रहरीले थप अनुसन्धान गरिरहेको जनाएको छ।
Discussion about this post